Read Maltese Bible with DC – IL-BIBBJA IL-KOTBA MQADDSA SALMI 105 Bible Online

SALMI 105 - Maltese Bible with DC – IL-BIBBJA IL-KOTBA MQADDSA bible

SALMI 105

¹Faħħru l-Mulej u xandru ismu, għarrfu lill-ġnus bl-għemejjel tiegħu.

²Għannulu u doqqulu, xandru l-għeġubijiet tiegħu kollha.

³Ftaħru bl-isem qaddis tiegħu; tifraħ il-qalb ta’ dawk li jfittxu l-Mulej.

⁴Ħabirku biex tagħrfu l-Mulej u l-qawwa tiegħu, fittxu ’l wiċċu l-ħin kollu.

⁵Ftakru fil-ħwejjeġ kbar li għamel, fl-għeġubijiet u l-ġudizzji tiegħu.

⁶Nisel Abraham, il-qaddej tiegħu, ulied Ġakobb, il-maħtur tiegħu,

⁷Jaħweh hu Alla tagħna! Mal-art kollha l-ġudizzji tiegħu!

⁸Jiftakar għal dejjem fil-patt tiegħu, fil-kelma li ta għal elf nisel,

⁹fil-patt li għamel ma’ Abraham, fil-wegħda li ħalef lil Iżakk,

¹⁰li ġedded lil Ġakobb b’liġi, lil Iżrael b’patt għal dejjem,

¹¹meta qal: “Lilek nagħti l-art ta’ Kangħan, bħala sehem wirtkom.”

¹²Ftit kienu għadhom jgħoddu, ma kinux ħlief ftit barranin f’dik l-art,

¹³jiġġerrew minn ġens għal ieħor, minn saltna għal għand poplu ieħor.

¹⁴Hu ma ħalla ’l ħadd jaħqarhom; slaten rażżan[194] minħabba fihom:

¹⁵“Tmissux ’il dawk li huma kkonsagrati lili[195], tagħmlux deni lill-profeti tiegħi.”

¹⁶Imbagħad bagħat il-ġuħ fuq l-art, qerdilhom il-qamħ minn wiċċ ir-raba’ tagħhom.

¹⁷Kien bagħat qabilhom raġel, ’il Ġużeppi, mibjugħ bi lsir.

¹⁸Rabtulu riġlejh bil-ktajjen, dawrulu l-ħadid ma’ għonqu,

¹⁹sakemm seħħ dak li kien ħabbar, u l-kelma tal-Mulej rebbieħ ħarġitu.

²⁰Is-sultan bagħat iħollu, dak li jaħkem il-popli ħelsu.

²¹Għamlu sid fuq id-dar tiegħu, ħallielu f’idejh ġidu kollu,

²²biex jgħallem hu stess lill-kbarat, u juri l-għerf lill-kapijiet tiegħu.

²³Imbagħad Iżrael niżel fl-Eġittu, Ġakobb għex barrani fl-art ta’ Ħam[196].

²⁴U kattar ħafna l-poplu tiegħu, saħħu aktar mill-għedewwa tiegħu.

²⁵Dawrilhom qalbhom biex jobogħdu l-poplu tiegħu, biex jimxu bil-qerq mal-qaddejja tiegħu.

²⁶Bagħat lil Mosè, il-qaddej tiegħu, u lil Aron, li hu kien għażel.

²⁷Wera bihom għeġubijietu, ħwejjeġ tal-għaġeb fl-art ta’ Ħam[197].

²⁸Bagħat id-dlam, u dalam; iżda huma webbsu rashom għal kliemu.

²⁹Biddlilhom l-ilma f’demm, qerdilhom il-ħut tagħhom.

³⁰Arthom imtliet biż-żrinġijiet, sa ġol-kmamar tas-slaten tagħhom.

³¹Mal-kelma tiegħu ġew qtajja’ ta’ dubbien, u nemus ma’ arthom kollha.

³²Tahom is-silġ minflok ix-xita; ilsna tan-nar ileħħu f’arthom.

³³Laqtilhom id-dwieli u s-siġar tat-tin, qerdilhom is-siġar tar-raba’ tagħhom.

³⁴Mal-kelma tiegħu ġew il-ġradijiet, ġradijiet żgħar li ħadd ma jgħoddhom.

³⁵U belgħu l-ħxejjex kollha f’arthom, kielu l-frott tar-raba’ tagħhom.

³⁶Qatel l-ulied il-kbar kollha ta’ arthom, l-ewwel frott tas-saħħa tagħhom.

³⁷Ħariġhom mgħobbija bil-fidda u d-deheb, ħadd ma kien għajjien fit-tribù tagħhom.

³⁸Ferħu l-Eġizzjani bit-tluq tagħhom, għax fuqhom kien waqa’ l-biża’ tagħhom.

³⁹Firex sħaba biex ikenninhom, xegħel in-nar għad-dawl billejl.

⁴⁰Talbuh u bagħtilhom is-summien; temagħhom sax-xaba’ bil-ħobż mis-sema.

⁴¹Xaqqaq blata u minnha ħareġ l-ilma, li ġera mad-deżert bħal xmara.

⁴²Għax ftakar fil-kelma qaddisa tiegħu, u f’Abraham, il-qaddej tiegħu.

⁴³U ħareġ bil-ferħ lill-poplu tiegħu, b’għajjat ta’ ferħ lill-magħżulin tiegħu.

⁴⁴U tahom artijiet il-ġnus, u xogħol il-popli wirtuh huma,

⁴⁵biex iħarsu l-kmandamenti tiegħu, u jżommu l-liġijiet tiegħu. Hallelujah!