Read Maltese Bible with DC – IL-BIBBJA IL-KOTBA MQADDSA SALMI 106 Bible Online

SALMI 106 - Maltese Bible with DC – IL-BIBBJA IL-KOTBA MQADDSA bible

SALMI 106

¹Hallelujah! Roddu ħajr lill-Mulej, għax hu tajjeb, għax għal dejjem it-tjieba tiegħu!

²Min jista’ jsemmi l-għemejjel kbar tal-Mulej, jew isemma’ t-tifħir tiegħu kollu?

³Hieni min jimxi bid-dritt, min jagħmel dejjem is-sewwa.

⁴Ftakar fija, Mulej, fi mħabbtek għall-poplu tiegħek; aħseb fija bis-salvazzjoni tiegħek,

⁵biex nara l-ġid tal-magħżulin tiegħek, biex nifraħ għall-ferħ ta’ ġensek, u niftaħar mal-poplu ta’ wirtek.

⁶Aħna dnibna, bħal missirijietna, waqajna fil-ħtija, għamilna l-ħażen.

⁷Missirijietna fl-Eġittu ma għarfux l-għeġubijiet tiegħek, ma ftakrux fit-tjieba kbira tiegħek; u ħaduha kontra Alla l-Għoli ħdejn il-Baħar tal-Qasab.

⁸Iżda hu salvahom minħabba f’ismu, biex juri l-qawwa tiegħu.

⁹Ċanfar lill-Baħar tal-Qasab, u dan nixef; mexxiehom f’qiegħ il-baħar bħal f’deżert.

¹⁰Salvahom minn id dawk li jobogħduhom; fdiehom minn id l-għedewwa tagħhom.

¹¹L-ilma għatta lil dawk li għakksuhom; anqas wieħed ma baqa’ minnhom.

¹²Imbagħad emmnu fi kliemu, u għana ta’ tifħir għannewlu.

¹³Iżda malajr insew għemilu; mank stennew li jseħħ ħsiebu.

¹⁴U qabdithom kilba bla lġiem fid-deżert, u ġarrbu lil Alla fix-xagħri,

¹⁵u tahom kulma talbuh, anzi fgahom bl-ikel sa mnifsejhom.

¹⁶Ġiethom l-għira għal Mosè fl-għerejjex, u għal Aron, il-qaddis tal-Mulej.

¹⁷Infetħet l-art u belgħet ’il Datan, u għalqet taħtha ’l Abiram u ’l sħabu.

¹⁸Ħaraq in-nar il-ġemgħa tan-nies tagħhom, nqerdu l-ħżiena fil-ħuġġieġa tan-nar.

¹⁹Għamlu għoġol ħdejn il-Ħoreb[198], qiemu xbieha tal-metall imdewweb.

²⁰Bidlu ’l Alla, il-glorja tagħhom, ma’ xbieha ta’ gendus jiekol il-ħaxix.

²¹U nsew ’l Alla, li salvahom, li għamel ħwejjeġ kbar fl-Eġittu,

²²għeġubijiet fl-art ta’ Ħam, ħwejjeġ tal-biża’ fil-Baħar tal-Qasab.

²³Kien għamel il-ħsieb li jeqridhom, li ma kienx għal Mosè, il-magħżul tiegħu, li waqaf fis-selħa tas-sur quddiemu, biex iberrdu u ma jeqridhomx.

²⁴Imbagħad maqdru l-art li tgħaxxaq, għax ma emmnux fil-kelma tiegħu.

²⁵Qagħdu jgergru fl-għerejjex tagħhom, ma ridux jisimgħu leħen il-Mulej.

²⁶Għalhekk rafa’ idu kontrihom, b’ħalfa li jmiddhom fid-deżert,

²⁷li fost il-ġnus ixerred ’l uliedhom u mal-artijiet iferrixhom.

²⁸Huma ngħataw lil Bagħal-pegħor, kielu mill-vittmi maqtula lill-allat mejta.

²⁹Irrabjawh bl-imġiba tagħhom, u marda kerha faqqgħet fosthom.

³⁰Qam imbagħad Fineħas u tħallas, u l-kastig waqaf għalkollox.

³¹Dan swielu għall-ġid tiegħu, minn nisel għal nisel, għal dejjem.

³²Inkurlawh ukoll ħdejn l-ilma ta’ Meriba, imqar Mosè weħel minħabba fihom[199];

³³għax huma tellfulu sabru, u qal dak li ġie fi lsienu.

³⁴Huma ma qerdux il-popli, kif il-Mulej kien qalilhom;

³⁵imma tħalltu mal-ġnus, u tgħallmu d-drawwiet tagħhom.

³⁶Taw qima lill-idoli tagħhom, li saru bħal nassa għalihom.

³⁷Qatlu b’sagrifiċċji lix-xjaten lil uliedhom subien u bniet.

³⁸Xerrdu demm bla ħtija, demm uliedhom subien u bniet, li ssagrifikaw lill-idoli ta’ Kangħan; u l-art tniġġset bid-dmija.

³⁹Hekk tħassru bl-għemejjel tagħhom, u żnew bl-imġiba tagħhom.

⁴⁰Għalhekk inkorla l-Mulej għall-poplu tiegħu, u stmell il-wirt tiegħu.

⁴¹U telaqhom f’idejn il-ġnus, ħakmuhom dawk li jobogħduhom.

⁴²Għakksuhom l-għedewwa tagħhom, u kellhom joqogħdu taħt idejhom.

⁴³Ħafna drabi hu ħelishom, iżda huma webbsu rashom miegħu, u ġġarrfu bil-ħażen tagħhom.

⁴⁴Iżda hu ħares lejn l-hemm tagħhom, xħin sama’ t-tnehid tagħhom.

⁴⁵Ftakar fil-patt tiegħu magħhom; u fit-tjieba kbira tiegħu ħenn għalihom.

⁴⁶U għamel li jsibu l-ħniena minn dawk kollha li kienu jassruhom.

⁴⁷Salvana, Mulej, Alla tagħna, u iġmagħna minn fost il-ġnus, biex irroddu ħajr lill-isem qaddis tiegħek u niftaħru bit-tifħir tiegħek.

⁴⁸Imbierek il-Mulej, Alla ta’ Iżrael, minn dejjem għal dejjem! Ħa jgħid il-poplu kollu: “Ammen!” Hallelujah!