Read Maltese Bible with DC – IL-BIBBJA IL-KOTBA MQADDSA SALMI 107 Bible Online

SALMI 107 - Maltese Bible with DC – IL-BIBBJA IL-KOTBA MQADDSA bible

SALMI 107

¹Roddu ħajr lill-Mulej, għax hu tajjeb[200], għax għal dejjem it-tjieba tiegħu.

²Ħa jgħidu hekk il-mifdijin tal-Mulej, dawk li hu fdiehom mill-ħakma tal-għadu;

³ġabarhom minn ħafna artijiet, mil-Lvant u l-Punent, mit-Tramuntana u n-Nofsinhar.

⁴Kienu jiġġerrew fid-deżert, u jterrqu fix-xagħri; belt fejn jgħammru ma sabux.

⁵Bil-għatx u bil-ġuħ, saħħithom bdiet tħallihom.

⁶Għajtu lill-Mulej fl-hemm tagħhom, u mid-dwejjaq tagħhom ħelishom.

⁷U qabbadhom it-triq it-tajba, biex imorru f’belt fejn jgħammru.

⁸Ħa jroddu ħajr lill-Mulej għal tjubitu, għall-għeġubijiet tiegħu mal-bnedmin.

⁹Għaliex hu jxabba’ lil min hu bil-għatx, u jimla bil-ġid lil min hu bil-ġuħ.

¹⁰Kienu fid-dlam u f’dell il-mewt, miżmuma fl-għaks u l-ktajjen,

¹¹għax ħaduha kontra l-kelma ta’ Alla, u warrbu l-ħsieb tal-Għoli.

¹²Għalhekk b’xogħol iebes għakkishom; waqgħu mitluqa bla ma sabu għajnuna.

¹³Għajtu lill-Mulej fl-hemm tagħhom, u mid-dwejjaq tagħhom ħelishom.

¹⁴U ħariġhom mid-dlam u minn dell il-mewt, u kisser il-ktajjen tagħhom.

¹⁵Ħa jroddu ħajr lill-Mulej għal tjubitu, għall-għeġubijiet tiegħu mal-bnedmin.

¹⁶Kisser il-bwieb tal-bronż, u qaċċat l-istaneg tal-ħadid.

¹⁷Infnew minħabba l-imġiba ħażina tagħhom; sofrew minħabba ħżunithom.

¹⁸L-ikel kien jiġihom ħażin; kienu waslu sa wara bieb il-mewt.

¹⁹Għajtu lill-Mulej fl-hemm tagħhom, u mid-dwejjaq tagħhom ħelishom.

²⁰Bagħat il-kelma tiegħu u fejjaqhom, u ħelishom mit-telfien.

²¹Ħa jroddu ħajr lill-Mulej għal tjubitu, għall-għeġubijiet tiegħu mal-bnedmin.

²²U joffrulu sagrifiċċji ta’ radd il-ħajr, u jxandru l-għemejjel tiegħu b’għana ferrieħi.

²³Dawk li jbaħħru fuq l-iġfna, li jinnegozjaw fuq l-ibħra bla tarf,

²⁴raw l-opri tal-Mulej u l-għeġubijiet tiegħu f’qiegħ il-baħar.

²⁵Hu ordna u qajjem riefnu, li qanqal imwieġ il-baħar.

²⁶Għolew sas-smewwiet u niżlu sa qiegħ il-baħar; qalbhom bdiet tferfer bil-biża’.

²⁷Bdew jitbandlu u jixxenglu bħal nies fis-sakra, u s-sengħa tagħhom xejn ma switilhom.

²⁸Għajtu lill-Mulej fl-hemm tagħhom, u mid-dwejjaq tagħhom ħelishom.

²⁹U bidel ir-riefnu f’żiffa, u sikket mewġ il-baħar.

³⁰Huma ferħu għax ibbnazza; u hu wassalhom sal-port li xtaqu.

³¹Ħa jroddu ħajr lill-Mulej għal tjubitu, għall-għeġubijiet tiegħu mal-bnedmin.

³²Ikabbruh fil-ġemgħa tal-poplu, u jfaħħruh fil-laqgħa tal-kbarat.

³³Hu jbiddel ix-xmajjar f’deżert, u n-nixxigħat f’art niexfa.

³⁴Art tajba jibdilha f’art mielħa, minħabba l-ħażen ta’ dawk li jgħixu fiha.

³⁵Hu jbiddel id-deżert f’għadajjar, u l-art niexfa f’nixxigħat tal-ilma.

³⁶Hemmhekk lill-imġewħin jagħtihom fejn jgħammru; u huma jibnu l-belt fejn joqogħdu.

³⁷Jiżirgħu r-raba’ u jħawlu d-dwieli, u jiġbru ħafna frott.

³⁸Hu jberikhom u joktru ħafna, ma jnaqqsilhomx l-imrieħel tagħhom.

³⁹Jekk jiġu li jonqsu u jintelqu, magħkusa mill-hemm u mill-għali,

⁴⁰hu jixħet it-tmaqdir fuq il-kbarat, u jitlaqhom jiġġerrew f’deżert bla triqat.

⁴¹Imma joħroġ mill-hemm lill-imsejkna, u jkattrilhom bħal merħla ’l nieshom.

⁴²Jaraw dan it-twajbin u jifirħu, u l-ħżiena kollha jagħlqu ħalqhom.

⁴³Min hu bil-għaqal iżomm dan f’moħħu, u jifhem it-tjieba tal-Mulej.