Read Maltese Bible with DC – IL-BIBBJA IL-KOTBA MQADDSA SALMI 109 Bible Online

SALMI 109 - Maltese Bible with DC – IL-BIBBJA IL-KOTBA MQADDSA bible

SALMI 109

¹Għall-mexxej tal-kor. Salm ta’ David. O Alla, li jiena nfaħħar, tibqax sieket!

²Għax nies ħżiena u qarrieqa fetħu fommhom kontrija; tkellmu u gidbu fuqi.

³Bi kliem il-mibegħda dawruni, għal xejn b’xejn ħaduha kontrija.

⁴Għad li jien ħabbejthom, huma jixluni; imma jiena bqajt nitlob.

⁵Iħallsuni għall-ġid bid-deni, u għal imħabbti bil-mibegħda.

⁶Qegħedlu fuqu bniedem ħażin, ħa jkollu min jixlih fuq lemintu.

⁷Quddiem il-ħaqq ħa joħroġ ħati, u t-talba tiegħu titqies bi dnub.

⁸Ftit ikunu l-jiem ta’ ħajtu, ħaddieħor jeħodlu xogħlu.

⁹Ikunu wliedu ltiema, u martu armla.

¹⁰Jiġġerrew u jittallbu wliedu, jitkeċċew minn djarhom imħarbta.

¹¹Jeħodlu kulma għandu minn silfu, jaħtaflu l-barrani qligħ xogħlu.

¹²Ħadd ma juri tjieba miegħu, ħadd ma jħenn għall-iltiema tiegħu.

¹³Jinqata’ darba għal dejjem nislu, f’nisel wieħed jitħassar ismu.

¹⁴Titfakkar il-ħtija ta’ missirijietu, u dnub ommu ma jintesiex:

¹⁵ikunu dejjem quddiem il-Mulej, u tinqered mill-art it-tifkira tiegħu.

¹⁶Għax ma ħasibx biex jagħmel il-ħniena, imma ħabbat l-imsejken u l-fqajjar, biex joqtol ’il min hu qalbu maqsuma.

¹⁷Is-saħta ħabb; u s-saħta tinżel fuqu; u l-barka li ma ħabbx titbiegħed minnu!

¹⁸Hu libes is-saħta bħal libsa; ħa tidħollu bħall-ilma f’ġismu, u bħal żejt f’għadmu!

¹⁹Tkunlu bħal libsa li tkebbu, u bħal ħżiem li dejjem iħażżmu.

²⁰Hekk iħallas il-Mulej lil dawk li jixluni, lil dawk li jgħidu l-ħażin fuqi.

²¹Imma int, Mulej Sidi, aqbeż għalija f’ġieħ ismek, eħlisni fil-ħniena u t-tjieba tiegħek.

²²Għax jiena msejken u fqajjar, u qalbi muġugħa ġewwa fija.

²³Qiegħed ngħib bħal dell li jgħaddi, imtajjar qisni ġrad[202].

²⁴Bis-sawm dgħajfa rkupptejja, niexef ġismi u magħlub.

²⁵Fuqi waqa’ t-tmaqdir tagħhom, iħarsu lejja u jħarrku rashom.

²⁶Għinni, Mulej, Alla tiegħi; salvani fit-tjieba tiegħek.

²⁷Ħa jagħraf li dan hu għemil tiegħek, li dan, Mulej, int għamiltu.

²⁸Jisħtuni huma, imma int tberikni; ħa jqumu l-għedewwa u jistħu, imma jifraħ il-qaddej tiegħek.

²⁹Jitgħattew bit-tmaqdir dawk li jixluni, jitkebbu bħal b’mantell bil-mistħija.

³⁰Niżżi ħajr ħafna lill-Mulej, f’ġemgħa kbira ta’ nies infaħħru.

³¹Għax hu joqgħod fuq il-lemin tal-fqajjar, biex isalvah minn dawk li jaqtgħuhielu għall-mewt.