Read Maltese Bible with DC – IL-BIBBJA IL-KOTBA MQADDSA SALMI 116 Bible Online

SALMI 116 - Maltese Bible with DC – IL-BIBBJA IL-KOTBA MQADDSA bible

SALMI 116

¹Inħobb il-Mulej, għax sama’ leħen it-tħannin tiegħi;

²għaliex hu tani widen fil-jum li fih sejjaħtlu.

³Il-ħbula tal-mewt dawruni[216], l-irbit tal-Imwiet ħakimni; fin-niket u l-hemm sibt ruħi.

⁴Imma isem il-Mulej sejjaħt: “Mulej, nitolbok, salvani!”

⁵Ħanin il-Mulej, u ġust; twajjeb hu Alla tagħna.

⁶Iħares id-dgħajfa l-Mulej; jien kont magħkus, u hu ħelisni.

⁷Erġa’, ruħ tiegħi, għall-mistrieħ tiegħek, għax il-Mulej għamillek il-ġid.

⁸Għax mill-mewt ħelisli ’l ħajti, lil għajnejja mid-dmugħ u ’l riġlejja mit-tfixkil.

⁹Jien nimxi quddiem il-Mulej f’art il-ħajjin.

¹⁰Bqajt nemmen[217], imqar meta għedt: “Jiena mdejjaq ħafna!”

¹¹Jien għedt fin-niket tiegħi: “Qarrieq hu kull bniedem.”

¹²Xi rrodd lill-Mulej għall-ġid kollu li għamel miegħi?

¹³Ngħolli l-kalċi tas-salvazzjoni[218], u isem il-Mulej insejjaħ.

¹⁴Intemm lill-Mulej il-wegħdiet tiegħi, quddiem il-poplu tiegħu kollu.

¹⁵Għażiża f’għajnejn il-Mulej hi l-mewt tal-ħbieb tiegħu[219].

¹⁶Iva, Mulej, jien qaddej tiegħek, jien qaddej tiegħek, bin il-qaddejja tiegħek. Int ħallejtli l-irbit tiegħi.

¹⁷Lilek noffri sagrifiċċju ta’ radd il-ħajr, u isem il-Mulej insejjaħ.

¹⁸Intemm lill-Mulej il-wegħdiet tiegħi, quddiem il-poplu tiegħu kollu,

¹⁹fil-btieħi ta’ dar il-Mulej, ġo nofsok, Ġerusalemm! Hallelujah!