Read Maltese Bible with DC – IL-BIBBJA IL-KOTBA MQADDSA SALMI 118 Bible Online

SALMI 118 - Maltese Bible with DC – IL-BIBBJA IL-KOTBA MQADDSA bible

SALMI 118

¹Faħħru l-Mulej, għaliex hu tajjeb, għax għal dejjem it-tjieba tiegħu!

²Ħa jgħidu wlied Iżrael: “Għal dejjem it-tjieba tiegħu[220].”

³Ħa tgħid dar Aron: “Għal dejjem it-tjieba tiegħu.”

⁴Ħa jgħidu dawk li jibżgħu mill-Mulej: “Għal dejjem it-tjieba tiegħu.”

⁵Sejjaħt il-Mulej fid-dwejjaq tiegħi; u l-Mulej weġibni, u ħariġni fil-wisa’.

⁶La l-Mulej miegħi, m’għandix għax nibża’; x’jista’ jagħmilli l-bniedem?

⁷Il-Mulej miegħi, hu l-għajnuna tiegħi, u nħares b’wiċċi minn quddiem lejn l-għedewwa tiegħi.

⁸Aħjar tiskenn fil-Mulej milli tittama fil-bnedmin.

⁹Aħjar tiskenn fil-Mulej milli tittama fil-kbarat.

¹⁰Il-ġnus kollha dawruni; imma f’isem il-Mulej irbaħthom.

¹¹Dawruni, minn kull naħa rassewni; imma f’isem il-Mulej irbaħthom.

¹²Bħan-naħal daru miegħi, bħan-nar tax-xewk madwari jħeġġu; imma f’isem il-Mulej irbaħthom.

¹³B’saħħithom kollha mbuttawni biex naqa’; imma l-Mulej tani l-għajnuna.

¹⁴Qawwa tiegħi u għana tiegħi l-Mulej; hu kien għalija s-salvazzjoni tiegħi.

¹⁵Għajjat ta’ ferħ u rebħ fl-għerejjex tat-tajbin: il-leminija tal-Mulej għamlet ħwejjeġ ta’ ħila!

¹⁶Il-leminija tal-Mulej ’il fuq merfugħa, il-leminija tal-Mulej għamlet ħwejjeġ ta’ ħila.

¹⁷Ma mmutx, imma nibqa’ ngħix, u nħabbar l-għemejjel tal-Mulej.

¹⁸Ħaqarni tassew il-Mulej, iżda ma telaqnix għall-mewt.

¹⁹Iftħuli l-bibien tal-ġustizzja[221]; ħa nidħol minnhom u rrodd ħajr lill-Mulej.

²⁰Dan hu bieb il-Mulej; il-ġusti jidħlu minnu.

²¹Niżżik ħajr talli weġibtni u kont għalija s-salvazzjoni tiegħi.

²²Il-ġebla li warrbu l-bennejja[222] saret il-ġebla tax-xewka.

²³Bis-saħħa tal-Mulej seħħ dan: ħaġa tal-għaġeb f’għajnejna.

²⁴Dan hu l-jum li għamel il-Mulej; ħa nifirħu u nithennew fih!

²⁵Ejja, nitolbuk, Mulej, salvana[223]! Ejja, nitolbuk, Mulej, agħtina r-riżq!

²⁶Imbierek minn ġej f’isem il-Mulej[224]! Inberkukom minn dar il-Mulej.

²⁷Jaħweh hu Alla; hu d-dawl tagħna. Tqassmu f’purċissjoni bil-friegħi f’idejkom sa ħdejn l-artal.

²⁸Alla tiegħi int, jien niżżik ħajr; Alla tiegħi, jien lilek inkabbar.

²⁹Faħħru l-Mulej, għaliex hu tajjeb, għax għal dejjem it-tjieba tiegħu!