Read Maltese Bible with DC – IL-BIBBJA IL-KOTBA MQADDSA SALMI 119 Bible Online

SALMI 119 - Maltese Bible with DC – IL-BIBBJA IL-KOTBA MQADDSA bible

SALMI 119

¹Henjin dawk[225] li triqthom bla ħtija, li jimxu fil-liġi tal-Mulej.

²Henjin dawk li jħarsu l-preċetti tiegħu, u li jfittxuh b’qalbhom kollha.

³Huma ma jagħmlux ħażen, imma jimxu fit-triqat tal-Mulej.

⁴Int tajt il-preċetti tiegħek, biex inħarsuhom bir-reqqa.

⁵Ħa jżomm sħiħ il-mixi tiegħi fil-ħarsien tal-kmandamenti tiegħek!

⁶Imbagħad ma jkollix għax nistħi, la naħseb fuq il-kmandamenti tiegħek kollha.

⁷Imbagħad infaħħrek b’qalb safja. Meta nitgħallem id-digrieti ġusti tiegħek.

⁸Irrid inħares il-kmandamenti tiegħek; la tħallinix għalkollox!

⁹Kif jista’ żagħżugħ jimxi safi fi triqtu? Billi jħares il-kelma tiegħek.

¹⁰B’qalbi kollha jiena nfittxek; tħallinix nitbiegħed mill-kmandamenti tiegħek.

¹¹Jien żammejt kelmtek f’qalbi, biex ma nidneb qatt kontrik.

¹²Imbierek int, Mulej! Għallimni l-kmandamenti tiegħek.

¹³B’xufftejja jiena nxandar id-digrieti kollha ta’ fommok.

¹⁴Nifraħ fit-triq tal-preċetti tiegħek, daqs kieku kelli l-għana kollu.

¹⁵Fuq il-preċetti tiegħek irrid naħseb, u nżomm għajnejja fuq triqatek.

¹⁶Bil-kmandamenti tiegħek irrid nitgħaxxaq, qatt ma ninsa l-kelma tiegħek.

¹⁷Kun twajjeb mal-qaddej tiegħek, agħtini li ngħix u nħares il-kelma tiegħek.

¹⁸Iftaħli għajnejja, biex nara l-għeġubijiet tal-liġi tiegħek.

¹⁹Barrani jien fuq l-art; taħbix minni l-kmandamenti tiegħek.

²⁰Tinfena qalbi l-ħin kollu bix-xewqa tad-digrieti tiegħek.

²¹Il-kburin inti ċċanfarhom; misħut min jitbiegħed mill-kmandamenti tiegħek.

²²Neħħi minn fuqi t-tagħjir u tkasbir tagħhom, għax jiena nħares il-preċetti tiegħek.

²³Imqar jekk il-kbarat joqogħdu jqassu fuqi, fuq il-kmandamenti tiegħek jibqa’ jaħseb il-qaddej tiegħek.

²⁴Il-preċetti tiegħek huma l-għaxqa tiegħi, huma jagħtuni l-parir tajjeb.

²⁵Mixħuta fit-trab hi ruħi; aħjini int skont kelmtek.

²⁶Triqati wrejtek, u int weġibtni; għallimni l-kmandamenti tiegħek.

²⁷Fehemni t-triq tal-preċetti tiegħek, biex naħseb fuq għeġubijietek.

²⁸Jiena nfnejt bin-niket; erfagħni int skont kelmtek.

²⁹Biegħed minni triq il-gideb; agħtini fi tjubitek il-liġi tiegħek.

³⁰Jiena għażilt it-triq tas-sewwa; ħtart għalija d-digrieti tiegħek.

³¹Inżomm sħiħ mal-preċetti tiegħek; Mulej, tħallinix naqa’ fil-mistħija.

³²Jien niġri fit-triq tal-kmandamenti tiegħek, għax int saħħaħtli qalbi.

³³Għallimni, Mulej, it-triq tal-kmandamenti tiegħek; jiena rrid nibqa’ fiha sal-aħħar.

³⁴Fehemni biex inħares il-liġi tiegħek u nagħmilha b’qalbi kollha.

³⁵Mexxini mill-mogħdija tal-kmandamenti tiegħek, għax fiha nsib l-għaxqa tiegħi.

³⁶Iġbidli qalbi lejn il-preċetti tiegħek, u mhux lejn ir-regħba.

³⁷Tħallix lil għajnejja jħarsu lejn il-frugħa; agħtini l-ħajja bil-kelma tiegħek.

³⁸Żomm il-wegħda li għamilt mal-qaddej tiegħek, li int għamilt ma’ dawk li jibżgħu minnek.

³⁹Warrab minni l-għajb li nibża’ minnu, għax tajbin huma d-digrieti tiegħek.

⁴⁰Ara kif jiena mxennaq għall-preċetti tiegħek; fil-ġustizzja tiegħek agħtini l-ħajja.

⁴¹Ħa tinżel fuqi tjubitek, Mulej, u s-salvazzjoni tiegħek skont il-wegħda tiegħek.

⁴²Imbagħad nagħti tweġiba lil min jgħajjarni, għax jien nafda fil-kelma tiegħek.

⁴³Tneħħili qatt minn fommi kliem is-sewwa, għax jien fid-digrieti tiegħek nittama.

⁴⁴Inħares il-liġi tiegħek għal dejjem, u għal dejjem ta’ dejjem.

⁴⁵U nkun bla xkiel fil-mixi tiegħi, għax jiena nfittex il-preċetti tiegħek.

⁴⁶U nitkellem fuq il-preċetti tiegħek quddiem is-slaten, u ma nistħix.

⁴⁷Nitgħaxxaq bil-kmandamenti tiegħek, li jiena ħabbejt.

⁴⁸Nerfa’ jdejja[226] lejn il-kmandamenti tiegħek, u naħseb fuq il-preċetti tiegħek.

⁴⁹Ftakar fil-kelma li tajt lill-qaddej tiegħek, li biha inti ttamajtni.

⁵⁰Dan hu l-faraġ fin-niket tiegħi: li l-wegħda tiegħek tagħtini l-ħajja.

⁵¹Jiddieħku bija l-kburin għall-aħħar; imma jiena ma nitbigħedx mil-liġi tiegħek.

⁵²Niftakar fid-digrieti tiegħek ta’ dari; fihom, Mulej, jiena nsib il-faraġ tiegħi.

⁵³Nagħdab għall-aħħar minħabba l-ħżiena li jitilqu l-liġi tiegħek.

⁵⁴L-għanja tiegħi l-kmandamenti tiegħek, f’dan il-post fejn jien barrani.

⁵⁵Billejl f’ismek niftakar, Mulej, u nħares il-liġi tiegħek.

⁵⁶Din hi l-barka li messet lili: li jiena nħares il-preċetti tiegħek.

⁵⁷Jien għedt, Mulej: “Dan hu sehmi, li nħares il-kelma tiegħek.”

⁵⁸Quddiemek nitlob b’qalbi kollha; ħenn għalija skont il-wegħda tiegħek.

⁵⁹Jien qist sewwa l-mixi tiegħi, u rġajt lura lejn il-preċetti tiegħek.

⁶⁰Ngħaġġel u ma nitnikkirx, biex inħares il-kmandamenti tiegħek.

⁶¹Il-ħbula tal-ħżiena dawramejt għalquni, imma jien ma nsejtx il-liġi tiegħek.

⁶²F’nofs il-lejl inqum infaħħrek minħabba d-digrieti ġusti tiegħek.

⁶³Nissieħeb ma’ kull min għandu l-biża’ tiegħek, ma’ dawk li jħarsu l-preċetti tiegħek.

⁶⁴Mimlija, Mulej, l-art bit-tjieba tiegħek; għallimni l-kmandamenti tiegħek.

⁶⁵Ġid għamilt mal-qaddej tiegħek, Mulej, skont il-kelma tiegħek.

⁶⁶Fehma tajba u għerf għallimni, għax jien nemmen fil-kmandamenti tiegħek.

⁶⁷Qabel ma għakkistni, jien kont fl-iżball; imma issa nħares il-kelma tiegħek.

⁶⁸Twajjeb int, u l-ġid tagħmel; għallimni l-kmandamenti tiegħek.

⁶⁹Jixluni l-kburin bil-gideb; imma jien b’qalbi kollha nħares il-preċetti tiegħek.

⁷⁰Smina bil-ħażen bħax-xaħam qalbhom[227]; imma jien bil-liġi tiegħek nitgħaxxaq.

⁷¹Swieli ta’ ġid li għakkistni, għax tgħallimt il-kmandamenti tiegħek.

⁷²Aħjar għalija l-liġi ta’ fommok mill-eluf ta’ flejjes tad-deheb u l-fidda.

⁷³Idejk għamluni u sawruni; fehemni u għallimni l-kmandamenti tiegħek.

⁷⁴Jarani u jifraħ min għandu l-biża’ tiegħek, għax jiena ttamajt fil-kelma tiegħek.

⁷⁵Jien naf, Mulej, li ġusti d-digrieti tiegħek; u li skont is-sewwa għakkistni.

⁷⁶Tkun it-tjieba tiegħek il-faraġ tiegħi, skont il-wegħda li għamilt mal-qaddej tiegħek,

⁷⁷Tiġi fuqi tjubitek, biex ikolli l-ħajja; għax il-liġi tiegħek hi l-għaxqa tiegħi.

⁷⁸Jistħu l-kburin, li bil-qerq jaħqruni; imma jien naħseb fil-preċetti tiegħek.

⁷⁹Ħa jduru lejja dawk li jibżgħu minnek, dawk li jagħrfu l-preċetti tiegħek.

⁸⁰Tkun qalbi bla ħtija fil-kmandamenti tiegħek, biex ma jkollix għax nistħi.

⁸¹Ninfena bix-xewqa tas-salvazzjoni tiegħek; jien nittama fil-kelma tiegħek.

⁸²Għejew għajnejja jistennew il-wegħda tiegħek; u jien nistaqsi: “Meta se tfarraġni?”

⁸³Sirt qisni ġild imnixxef fid-duħħan; imma ma nsejtx il-kmandamenti tiegħek.

⁸⁴Kemm se jdum jistenna l-qaddej tiegħek? Meta se tagħmel ħaqq minn dawk li jħabbtuni?

⁸⁵Ħaffru l-kburin ħofra għalija, dawk li ma jimxux skont il-liġi tiegħek.

⁸⁶Sewwa huma l-kmandamenti tiegħek kollha; għinni int, meta bil-qerq iħabbtuni.

⁸⁷Għal ftit ma qerdunix minn din l-art; imma jien ma ħallejtx il-preċetti tiegħek.

⁸⁸Fit-tjieba tiegħek agħtini l-ħajja; u jiena nħares il-preċetti ta’ fommok.

⁸⁹Għal dejjem, Mulej, il-kelma tiegħek; hi mwaqqfa fis-sod fis-smewwiet.

⁹⁰Minn nisel għal nisel il-fedeltà tiegħek; fuq l-art waqqaftha, u żammet fis-sod.

⁹¹B’digriet tiegħek għadhom sħaħ sa llum; għax kollox hu għall-qadi tiegħek.

⁹²Li ma sibtx l-hena fil-liġi tiegħek, kont nintemm fin-niket tiegħi.

⁹³Ma ninsa qatt il-preċetti tiegħek, għax bihom int tagħtini l-ħajja.

⁹⁴Tiegħek jien; salvani int! Jiena nfittex il-preċetti tiegħek.

⁹⁵Jgħassuli l-ħżiena biex jeqirduni; imma jien ħsiebi fil-preċetti tiegħek.

⁹⁶Jien rajt it-tmiem ta’ kulma jgħaddi; imma bla tarf il-kmandamenti tiegħek.

⁹⁷Kemm inħobbha l-liġi tiegħek! Il-jum kollu ħsiebi fiha.

⁹⁸Il-kmandament tiegħek għal dejjem miegħi, jagħmilni egħref mill-għedewwa tiegħi.

⁹⁹Jien nifhem aktar mill-imgħallmin tiegħi kollha, għax ħsiebi fil-kmandamenti tiegħek.

¹⁰⁰Aktar mix-xjuħ jien bil-għaqal, għax inħares il-preċetti tiegħek.

¹⁰¹Minn kull triq ħażina nwarrab riġlejja, biex inħares il-kelma tiegħek.

¹⁰²Mid-digrieti tiegħek qatt ma nitbiegħed, għax int kont li għallimthomli.

¹⁰³Kemm hi ħelwa l-wegħda tiegħek! Oħla mill-għasel għal fommi.

¹⁰⁴Jien ksibt id-dehen bil-preċetti tiegħek; għalhekk nobgħod kull triq qarrieqa.

¹⁰⁵Fanal għal riġlejja l-kelma tiegħek, u dawl fil-mogħdija tiegħi.

¹⁰⁶Ħlift, u rrid inżomm kelmti, li nħares id-digrieti ġusti tiegħek.

¹⁰⁷Ninsab imnikket għall-aħħar, Mulej; agħtini l-ħajja skont il-kelma tiegħek.

¹⁰⁸Ilqa’, Mulej, il-qima ta’ fommi, u għallimni d-digrieti tiegħek.

¹⁰⁹Ħajti dejjem fit-tiġrif, imma qatt ma ninsa l-liġi tiegħek.

¹¹⁰Il-ħżiena nasbuli x-xibka, imma jien ma warrabtx mill-preċetti tiegħek.

¹¹¹Il-preċetti tiegħek wirti għal dejjem; huma l-għaxqa ta’ qalbi.

¹¹²Inħajjar ’il qalbi biex tħares il-kmandamenti tiegħek, għal dejjem u sal-aħħar.

¹¹³In-nies ta’ żewġt iqlub[228] nobgħodhom; imma l-liġi tiegħek inħobbha.

¹¹⁴Inti l-kenn u t-tarka tiegħi; fil-kelma tiegħek jien nittama.

¹¹⁵Tbiegħdu minni, intom nies ħżiena, biex inħares il-kmandamenti ta’ Alla tiegħi.

¹¹⁶Żommni skont il-wegħda tiegħek, biex nibqa’ ħaj; tħallix bla temma t-tama tiegħi.

¹¹⁷Għinni int, u jiena nsalva; u ħsiebi jkun dejjem fil-kmandamenti tiegħek.

¹¹⁸Int tistmell ’il kull min jitbiegħed mill-kmandamenti tiegħek, għax qarrieqa l-fehma tagħhom.

¹¹⁹Bħal skart għalik il-ħżiena tal-art; għalhekk inħobb il-preċetti tiegħek.

¹²⁰Jitkexkex ġismi bil-biża’ tiegħek; mid-digrieti tiegħek nibża’.

¹²¹Jien għamilt il-ħaqq u s-sewwa; titlaqnix f’idejn dawk li jaħqruni.

¹²²Serraħ ras il-qaddej tiegħek li tridlu l-ġid; tħallix li l-kburin jgħakksuni.

¹²³Għejew għajnejja jistennew is-salvazzjoni tiegħek, u l-wegħda tal-ġustizzja tiegħek.

¹²⁴Imxi mal-qaddej tiegħek skont it-tjieba tiegħek, għallimni l-kmandamenti tiegħek.

¹²⁵Qaddej tiegħek jien; agħtini d-dehen, biex nagħraf il-preċetti tiegħek.

¹²⁶Issa l-waqt li tindaħal, Mulej, għax kisru l-liġi tiegħek.

¹²⁷Għalhekk inħobb il-kmandamenti tiegħek, aktar mid-deheb, mid-deheb l-aktar fin.

¹²⁸Għalhekk jien nimxi dritt fuq il-preċetti tiegħek, u nobgħod kull triq qarrieqa.

¹²⁹Tal-għaġeb huma l-preċetti tiegħek, għalhekk tħarishom qalbi.

¹³⁰It-tifsir ta’ kelmtek jagħti d-dawl, ifiehem lil min ma jafx.

¹³¹Niftaħ fommi u nieħu r-ruħ, għax nixxennaq għall-kmandamenti tiegħek.

¹³²Dur lejja u ħenn għalija, kif dejjem tagħmel ma’ min iħobb ’l ismek.

¹³³Żomm sħiħ il-mixi tiegħi skont il-wegħda tiegħek, u ebda deni ma jaħkem fuqi.

¹³⁴Eħlisni mill-moħqrija tal-bniedem, u nħares il-preċetti tiegħek.

¹³⁵Ħa jiddi wiċċek[229] fuq il-qaddej tiegħek, għallimni l-kmandamenti tiegħek.

¹³⁶Id-dmugħ bħal wied iġelben minn għajnejja, għax ma jħarsux il-bnedmin il-liġi tiegħek.

¹³⁷Ġust int, Mulej; u sewwa d-digrieti tiegħek.

¹³⁸Bil-ġustizzja għamilt il-preċetti tiegħek, u b’fedeltà mill-akbar.

¹³⁹Tifnini l-ħeġġa tiegħi, għax insew kelmtek l-għedewwa tiegħi.

¹⁴⁰Il-wegħda tiegħek jien ippruvajtha; għalhekk iħobbha l-qaddej tiegħek.

¹⁴¹Għalkemm jien żgħir u mżeblaħ, ma ninsiex il-preċetti tiegħek.

¹⁴²Ġustizzja ta’ dejjem hi l-ġustizzja tiegħek, u sewwa l-liġi tiegħek.

¹⁴³Għalkemm id-diqa u n-niket waqgħu fuqi, il-kmandamenti tiegħek baqgħu l-għaxqa tiegħi.

¹⁴⁴Ġustizzja ta’ dejjem il-preċetti tiegħek; agħtini d-dehen biex ikolli l-ħajja.

¹⁴⁵B’qalbi kollha ngħajjatlek; weġibni, Mulej; irrid inħares il-kmandamenti tiegħek.

¹⁴⁶Lilek insejjaħ: salvani int; u nħares il-preċetti tiegħek.

¹⁴⁷Sa minn qabel is-sebħ nitlob l-għajnuna; u fi kliemek jien nittama.

¹⁴⁸B’għajnejja miftuħa tul is-sahriet tal-lejl, jien noqgħod naħseb fuq il-wegħda tiegħek.

¹⁴⁹Isma’ leħni, Mulej, fit-tjieba tiegħek; u żommni ħaj skont id-digrieti tiegħek.

¹⁵⁰Qorbu lejja dawk li jfittxu l-ħażen, dawk li tbiegħdu mil-liġi tiegħek.

¹⁵¹Imm’inti ħdejja, Mulej; sewwa huma l-kmandamenti tiegħek.

¹⁵²Jien ili naf mill-preċetti tiegħek li għal dejjem int waqqafthom.

¹⁵³Ħares lejn in-niket tiegħi, u eħlisni, għax jien ma nsejtx il-liġi tiegħek.

¹⁵⁴Iddefendi l-kawża tiegħi, u ifdini; agħtini l-ħajja skont il-wegħda tiegħek.

¹⁵⁵’Il bogħod mill-ħżiena s-salvazzjoni, għax ma jfittxux il-kmandamenti tiegħek.

¹⁵⁶Kbira l-ħniena tiegħek, Mulej; agħtini l-ħajja skont id-digrieti tiegħek.

¹⁵⁷Ħafna li jagħmlu għalija u jħabbtuni; imma jien ma nitbigħedx mill-preċetti tiegħek.

¹⁵⁸Nara ’l dawk li ħallewk u nistkerrahhom, għax ma jħarsux il-kelma tiegħek.

¹⁵⁹Ara, kif inħobb il-preċetti tiegħek, Mulej; agħtini l-ħajja skont it-tjieba tiegħek.

¹⁶⁰Is-sewwa tiegħek il-qofol ta’ kelmtek; għal dejjem id-digrieti tal-ġustizzja tiegħek.

¹⁶¹Il-kbarat għal xejn b’xejn jagħmlu għalija, imma minn kelmtek tibża’ qalbi.

¹⁶²Ferħan jien minħabba l-wegħda tiegħek, bħal min isib xi priża kbira.

¹⁶³Il-qerq nobogħdu u nistkerrhu, imma l-liġi tiegħek inħobbha.

¹⁶⁴Seba’ darbiet kull jum infaħħrek[230] għad-digrieti ġusti tiegħek.

¹⁶⁵Sliem bil-kotra għal min iħobb il-liġi tiegħek; ma hemm ebda tfixkil għalihom.

¹⁶⁶Nistenna s-salvazzjoni tiegħek, Mulej; u nħares il-kmandamenti tiegħek.

¹⁶⁷Ruħi tħares il-preċetti tiegħek; u jiena nħobbhom ħafna.

¹⁶⁸Inħares il-preċetti u l-kmandamenti tiegħek; quddiem għajnejk l-imġiba tiegħi kollha.

¹⁶⁹Ħa tasal quddiemek, Mulej, l-għajta tiegħi; agħtini d-dehen skont il-kelma tiegħek.

¹⁷⁰Ħa jasal quddiemek it-tħannin tiegħi; eħlisni skont il-wegħda tiegħek.

¹⁷¹Jinfexxu xufftejja fit-tifħir tiegħek, għax int tgħallimni l-kmandamenti tiegħek.

¹⁷²Ixandar ilsieni l-wegħda tiegħek, għax kollha ġusti l-kmandamenti tiegħek.

¹⁷³Ħa tkun idek l-għajnuna tiegħi, għax jien ħtart il-preċetti tiegħek.

¹⁷⁴Jien nixtieq is-salvazzjoni tiegħek, Mulej; il-liġi tiegħek hija l-għaxqa tiegħi.

¹⁷⁵Ħa nibqa’ ħaj, biex infaħħrek! Ikunu d-digrieti tiegħek l-għajnuna tiegħi!

¹⁷⁶Jien ħriġt mit-triq bħal nagħġa mitlufa; fittex il-qaddej tiegħek, għax jien ma nsejtx il-kmandamenti tiegħek.