Read Maltese Bible with DC – IL-BIBBJA IL-KOTBA MQADDSA SALMI 135 Bible Online

SALMI 135 - Maltese Bible with DC – IL-BIBBJA IL-KOTBA MQADDSA bible

SALMI 135

¹Hallelujah! Faħħru isem il-Mulej, faħħruh, qaddejja tal-Mulej,

²intom li qegħdin f’dar il-Mulej, fil-wesgħat ta’ madwar it-tempju ta’ Alla tagħna.

³Faħħru l-Mulej, għax hu tajjeb, għannu lil ismu, għax hu sabiħ.

⁴Għax għażel il-Mulej ’il Ġakobb[246], lil Iżrael, biex ikun il-poplu tiegħu.

⁵Naf tassew li kbir il-Mulej; fuq l-allat kollha Alla Sidna.

⁶Kulma jogħġbu l-Mulej jagħmlu fis-smewwiet u fuq l-art, fil-baħar u f’qiegħ l-ibħra kollha.

⁷Hu jtella’ s-sħab minn truf l-art, jibgħat il-beraq u x-xita, joħroġ l-irjieħ mill-imħażen tiegħu.

⁸Hu darab l-ulied il-kbar tal-Eġittu, kemm bnedmin u kemm bhejjem.

⁹Sinjali u għeġubijiet għamel f’nofsok, Eġittu, u laqtu l-Fargħun u l-qaddejja tiegħu kollha.

¹⁰Hu darab ġnus bla għadd, u qered slaten qawwija.

¹¹Qered ’il Siħon, sultan tal-Amurrin, lil Għog, sultan ta’ Basan, u s-saltniet kollha ta’ Kangħan.

¹²U l-art tagħhom qassamha b’wirt, b’wirt lil Iżrael, il-poplu tiegħu.

¹³Mulej, għal dejjem idum ismek! Mulej, minn żmien għal żmien il-fama tiegħek!

¹⁴Għax il-Mulej jagħmel ħaqq mal-poplu tiegħu, juri ħniena mal-qaddejja tiegħu.

¹⁵L-idoli tal-ġnus mhumiex ħlief deheb u fidda, xogħol ta’ id il-bniedem:

¹⁶għandhom il-fomm, u ma jitkellmux; għandhom l-għajnejn, u ma jarawx;

¹⁷għandhom il-widnejn, u ma jisimgħux; anqas nifs ma għandhom fi mnifsejhom.

¹⁸Bħalhom ikunu dawk li jagħmluhom, u dawk kollha li jittamaw fihom.

¹⁹Bierek, Iżrael, il-Mulej; bierek, dar Aron, il-Mulej;

²⁰bierek, dar Levi, il-Mulej; bierku l-Mulej, intom li tibżgħu mill-Mulej.

²¹Imbierek il-Mulej minn Sijon, hu li joqgħod f’Ġerusalemm! Hallelujah!