Read Maltese Bible with DC – IL-BIBBJA IL-KOTBA MQADDSA SALMI 137 Bible Online

SALMI 137 - Maltese Bible with DC – IL-BIBBJA IL-KOTBA MQADDSA bible

SALMI 137

¹F’xatt ix-xmajjar ta’ Babilonja[252], hemm qgħadna bilqiegħda u bkejna, aħna u niftakru f’Sijon.

²Mas-siġar tal-luq tagħha, dendilna ċ-ċetri tagħna.

³Għax hemm, dawk li ijassruna, talbuna ngħannulhom xi għanja; dawk li hemm għakksuna stennew minna għana ta’ ferħ: “Għannulna mill-għana ta’ Sijon.”

⁴Kif nistgħu ngħannu l-għana tal-Mulej f’art barranija?

⁵Tibbiesli idi l-leminija, jekk qatt ninsa lilek, Ġerusalemm!

⁶Jeħilli lsieni mas-saqaf ta’ ħalqi, jekk ma niftakarx fik, jekk ma nżommx ’il Ġerusalemm ’il fuq minn kull ferħ tiegħi!

⁷Ftakar, Mulej, x’qalu wlied Edom f’jum il-waqgħa ta’ Ġerusalemm[253], meta bdew jgħidu: “Ġarrfuha, ġarrfuha sal-pedamenti tagħha!”

⁸Ja Belt tal-Babilonja, int għad tinqered! Hieni min iħallsek għal kulma għamiltilna!

⁹Hieni min jaħtaflek it-trabi tiegħek[254] u jsabbathomlok mal-blat!