Read Maltese Bible with DC – IL-BIBBJA IL-KOTBA MQADDSA SALMI 139 Bible Online

SALMI 139 - Maltese Bible with DC – IL-BIBBJA IL-KOTBA MQADDSA bible

SALMI 139

¹Lill-mexxej tal-kor. Salm ta’ David. Mulej, int tgħarbilni u tagħrafni;

²int taf meta noqgħod u meta nqum, int tagħraf mill-bogħod ħsibijieti.

³Int tagħraf il-mixi u l-waqfien tiegħi; triqati kollha inti tafhom sewwa.

⁴Inkun għadni anqas lissint il-kelma, meta int, Mulej, tkun ġa tafha kollha.

⁵Dawramejt inti tħaddanni, u tqegħedli idek fuqi.

⁶L-għerf tiegħek tal-għaġeb, ma nwassalx għalih; għoli wisq, u ma nlaħħaqx miegħu.

⁷Fejn immur ’il bogħod mill-ispirtu tiegħek? Jew fejn nista’ naħrab minn quddiem wiċċek?

⁸Jekk nitla’ fis-smewwiet, hemm int; jekk nimtedd f’qiegħ l-art, int hemm ukoll.

⁹Jekk nilbes il-ġwienaħ tas-sebħ[256], u mmur ngħammar fi truf il-baħar,

¹⁰hemm ukoll tilħaqni idek, u taqbadni l-leminija tiegħek.

¹¹Jekk ngħid: “Ħa jaħbini d-dlam, ħa jkunli d-dawl lejl madwari,”

¹²anqas id-dlam ma hu mudlam; għalik il-lejl jiddi bħan-nhar; id-dlam bħad-dawl għalik[257].

¹³Għax int sawwart il-ġewwieni tiegħi, u f’ġuf ommi inti nsiġtni.

¹⁴Irroddlok ħajr, għax b’mod tal-għaġeb għamiltni: tal-għaġeb huma l-għemejjel tiegħek. U ’l ruħi inti tafha tajjeb.

¹⁵Ma kienx moħbi għadmi minnek, meta kont qiegħed insir fis-satra u nintiseġ fil-qigħan tal-art[258].

¹⁶Raw għajnejk l-għemejjel tiegħi: kollha nkitbu fil-ktieb tiegħek[259]; u jiemi kienu ġa magħduda meta ebda wieħed ma kien għad hemm.

¹⁷Kemm huma tqal ħsibijietek għalija, o Alla! Kemm hu bla tarf l-għadd tagħhom!

¹⁸Li kelli ngħoddhom, huma aktar mir-ramel; xħin nasal fl-aħħar, inkun għadni fil-bidu miegħek.

¹⁹Mhux li kont teqred il-ħżiena, o Alla! Mhux li l-qattiela jitbiegħdu minni!

²⁰Nies li b’qerq kontrik jeħduha, li għalxejn kontrik iqumu.

²¹Kemm nobgħodhom, Mulej, lil dawk li jobogħduk, kemm nistmellhom lil dawk li jqumu kontrik!

²²B’mibegħda mill-akbar nobgħodhom, għalija huma għedewwa tiegħi.

²³Għarbilni, o Alla, u agħraf qalbi; iflini, u kun af ħsibijieti.

²⁴Ara iniex miexi fi triq ħażina, u mexxini fit-triq ta’ dejjem[260].