Read Maltese Bible with DC – IL-BIBBJA IL-KOTBA MQADDSA SALMI 141 Bible Online

SALMI 141 - Maltese Bible with DC – IL-BIBBJA IL-KOTBA MQADDSA bible

SALMI 141

¹Salm ta’ David. Lilek, Mulej, insejjaħ; fittex għinni! Isma’ leħni, jiena u nsejjaħlek.

²Ikun it-talb tiegħi bħal inċens quddiemek[263]; ikunu idejja merfugħa ’l fuq bħas-sagrifiċċju filgħaxija.

³Qegħedli, Mulej, ilġiem fuq fommi, agħmilli l-għassa ma’ bieb xufftejja.

⁴Tħallix li qalbi ddur lejn ħwejjeġ ħżiena biex jiena nagħmel dak li hu ħażin; tħallix li nissieħeb ma’ nies ħżiena, u anqas induq l-ikel bnin tagħhom.

⁵Ħa jsawwatni l-ġust u jċanfarni, għax dan jagħmlu mqanqal mit-tjieba. Imma żejt il-midneb ma jidliklix rasi; jien nibqa’ nitlob kontra ħżunithom.

⁶Fuq il-blat jitwaddbu l-kapijiet tagħhom; imbagħad jitgħallmu li sabiħ hu kliemi.

⁷Bħall-frak u l-laqx mal-art imxerred, hekk jitferrex għadamhom f’daħlet qiegħ l-art.

⁸Imma lejk, Mulej Sidi, jiena ndawwar għajnejja, fik nistkenn, la tħallinix nintrema.

⁹Ħarisni mix-xibka li firxu għalija, min-nassa ta’ dawk li jagħmlu l-ħażen.

¹⁰Ħa jaqgħu l-ħżiena fix-xbiek tagħhom, waqt li jiena waħdi neħlisha.