Read Maltese Bible with DC – IL-BIBBJA IL-KOTBA MQADDSA SALMI 142 Bible Online

SALMI 142 - Maltese Bible with DC – IL-BIBBJA IL-KOTBA MQADDSA bible

SALMI 142

¹Maskil. Ta’ David meta kien fl-għar. Talba.

²B’leħen qawwi lill-Mulej insejjaħ, b’leħen qawwi lill-Mulej nitlob.

³Inressaq quddiemu t-tnehid tiegħi, id-dwejjaq tiegħi quddiemu nqiegħed.

⁴Xħin ruħi ġo fija tinfena, int tkun taf minn xiex għaddej. Fit-triq li fiha nimxi, huma ħbew nassa għalija.

⁵Inħares fuq il-lemin u nara li m’hemm ħadd min jagħti kasi, m’hemmx mnejn nista’ naħrab, m’hemm ħadd min jieħu ħsiebi.

⁶Lilek, Mulej, insejjaħ; ngħidlek: “Inti l-kenn tiegħi, inti sehmi f’art il-ħajjin.

⁷Agħti widen għall-għajta tiegħi, għax ninsab mitluq għall-aħħar. Eħlisni minn dawk li daru għalija, għax huma aqwa minni.

⁸Mill-ħabs oħroġni, biex irrodd ħajr lil ismek. Madwari jduru l-ġusti[264], għax int timxi tajjeb miegħi.”