Read Maltese Bible with DC – IL-BIBBJA IL-KOTBA MQADDSA SALMI 144 Bible Online

SALMI 144 - Maltese Bible with DC – IL-BIBBJA IL-KOTBA MQADDSA bible

SALMI 144

¹Ta’ David. Imbierek il-Mulej, il-blata tiegħi, li jħarriġli idejja għat-taqbida u subgħajja għat-taqtigħa.

²Tjieba tiegħi u qawwa tiegħi, kenn tiegħi u ħellies tiegħi, tarka tiegħi, fih jien nistkenn; hu li jrażżan il-popli taħti.

³Mulej, x’inhu l-bniedem biex taħseb fih, jew bin il-bniedem biex tiftakar fih?

⁴Bħal daqsxejn ta’ nifs hu l-bniedem; bħal dell li jgħaddi huma jiemu.

⁵Ofroq, Mulej, is-smewwiet tiegħek, u inżel; miss l-għoljiet, u huma jdaħħnu.

⁶Agħmel il-beraq u xerridhom; faqqa’ s-sajjetti u ħarrabhom.

⁷Midd idek mill-għoli, aħtafni mill-ilma kotran; eħlisni minn id il-barrani,

⁸li b’fommu jgħid il-gideb, u b’lemintu jixhed il-qerq.

⁹O Alla, għanja ġdida rrid ninsiġlek, fuq arpa ta’ għaxar kordi ngħannihielek.

¹⁰Int li tagħti r-rebħa lis-slaten, li teħles lil David, il-qaddej tiegħek.

¹¹Mis-sejf tal-ħażin ħarisni; eħlisni minn id il-barrani, li b’fommu jgħid il-gideb, u b’lemintu jixhed il-qerq.

¹²Ħa jkunu wliedna f’żgħożithom bħal xitel imlaħħaq sewwa; uliedna l-bniet bħal kolonni minquxa, iżejnu l-irkejjen tal-palazzi.

¹³Ħa jkunu l-imħażen tagħna mfawra, u jagħtu kull xorta ta’ ġid. L-imrieħel bl-eluf iwelldu, għaxriet ta’ eluf fir-raba’ tagħna;

¹⁴ħa jkunu mgħobbija il-bhejjem tagħna. Ebda selħa fis-swar, ħadd ma jaqa’ lsir, ma jkunx hemm biki fil-pjazez tagħna.

¹⁵Hieni l-poplu li għandu dan kollu! Hieni l-poplu li Jaħweh hu Alla tiegħu!