Read Maltese Bible with DC – IL-BIBBJA IL-KOTBA MQADDSA SALMI 146 Bible Online

SALMI 146 - Maltese Bible with DC – IL-BIBBJA IL-KOTBA MQADDSA bible

SALMI 146

¹Hallelujah[265]! Faħħar, ruħ tiegħi, il-Mulej!

²Infaħħar il-Mulej tul ħajti kollha; ngħanni lil Alla tiegħi[266] kemm indum ħaj.

³La tittamawx fil-kbarat, għax il-bniedem ma jsalvakomx.

⁴Malli toħroġ ruħu, lejn l-art jerġa’ jmur; jintemmu dakinhar ħsibijietu.

⁵Hieni min f’Alla ta’ Ġakobb isib l-għajnuna tiegħu, min għandu t-tama fil-Mulej, Alla tiegħu,

⁶li għamel is-sema, l-art u l-baħar, u kulma jinsab fihom; hu li jżomm kelmtu għal dejjem,

⁷li jagħmel ħaqq lill-maħqurin, u jagħti l-ħobż lill-imġewħin. Il-Mulej li jeħles lill-imjassrin;

⁸il-Mulej li jiftaħ għajnejn l-għomja; il-Mulej li jerfa’ lill-milwijin; il-Mulej li jħobb lill-ġusti;

⁹il-Mulej li jħares lill-barranin; hu li jżomm lill-iltim u lill-armla, imma lill-ħżiena jħarbtilhom triqathom.

¹⁰Il-Mulej isaltan għal dejjem; Alla tiegħek, Sijon, minn nisel għal nisel. Hallelujah!