Read Maltese Bible with DC – IL-BIBBJA IL-KOTBA MQADDSA SALMI 147 Bible Online

SALMI 147 - Maltese Bible with DC – IL-BIBBJA IL-KOTBA MQADDSA bible

SALMI 147

¹Hallelujah! Faħħru l-Mulej, għax tajjeb li tgħanni lil Alla tagħna; għax ħelu u xieraq it-tifħir tiegħu.

²Jibni ’l Ġerusalemm il-Mulej, jiġma’ l-imxerrdin ta’ Iżrael.

³Hu jfejjaq il-qlub maqsuma, hu jorbot il-ġrieħi tagħhom.

⁴Hu jgħodd in-numru tal-kwiekeb; kollha jsejħilhom b’isimhom.

⁵Kbir Sidna l-Mulej, u ta’ qawwa kbira; bla tarf id-dehen tiegħu.

⁶Jerfa’ l-imsejknin il-Mulej, u jniżżel sal-art il-ħżiena.

⁷Għannu lill-Mulej innu ta’ radd il-ħajr; doqqu fuq l-arpa lil Alla tagħna.

⁸Hu li jiksi bis-sħab is-smewwiet, iħejji għall-art ix-xita, u jnibbet il-ħaxix fuq l-għoljiet.

⁹Hu jipprovdi lill-bhejjem l-għalf tagħhom, u lill-frieħ taċ-ċawl meta jgħajtu.

¹⁰Ma jitgħaxxaqx bis-saħħa taż-żiemel, anqas b’riġlejn l-irġiel b’saħħithom.

¹¹Jitgħaxxaq il-Mulej b’min għandu l-biża’ tiegħu, u b’min jittama fit-tjieba tiegħu.

¹²Sebbaħ, Ġerusalemm, il-Mulej; faħħar ’l Alla tiegħek, Sijon!

¹³Hu jsaħħaħ l-istaneg ta’ bwiebek, u jbierek ġewwa fik ’l uliedek.

¹⁴Hu jqiegħed fis-sliem it-trufijiet ta’ artek, u lilek bl-aħjar qamħ ixebbgħek.

¹⁵Hu jibgħat fuq l-art il-kmand tiegħu; bil-ħeffa tiġri l-kelma tiegħu.

¹⁶Jibgħat is-silġ bħas-suf; ixerred bħar-rmied il-ġlata.

¹⁷Jitfa’ s-silġ bħal frak tal-ħobż; u jagħqad l-ilma bil-kesħa tiegħu.

¹⁸Isamma’ kelmtu, u jinħall is-silġ; jonfoħ ir-riħ tiegħu, u jiġri l-ilma!

¹⁹Hu jxandar kelmtu lil Ġakobb, il-liġijiet u d-digrieti tiegħu lil Iżrael.

²⁰Ma għamel hekk ma’ ebda poplu; lil ħadd ma għarraf id-digrieti tiegħu. Hallelujah!