Read Maltese Bible with DC – IL-BIBBJA IL-KOTBA MQADDSA SALMI 148 Bible Online

SALMI 148 - Maltese Bible with DC – IL-BIBBJA IL-KOTBA MQADDSA bible

SALMI 148

¹Hallelujah! Faħħru l-Mulej mis-smewwiet, faħħruh fl-ogħla smewwiet!

²Faħħruh, anġli tiegħu kollha, faħħruh, eżerċti tiegħu kollha!

³Faħħruh, intom xemx u qamar, faħħruh, kwiekeb kollha li tiddu!

⁴Faħħruh, smewwiet l-aktar għolja, u intom ilmijiet ta’ fuq is-smewwiet[267]!

⁵Ħa jfaħħru dawn kollha isem il-Mulej: għax hu kkmanda, u huma nħolqu;

⁶hu waqqafhom għal dejjem ta’ dejjem; tahom ordni li qatt ma tgħaddi.

⁷Faħħru l-Mulej minn fuq l-art, mostri tal-baħar u abbissi kollha.

⁸In-nar u s-silġ, il-borra u ċ-ċpar, l-irwiefen, li jisimgħu kelmtu,

⁹il-muntanji u l-għoljiet kollha, is-siġar tal-frott u ċ-ċedri kollha,

¹⁰il-bhejjem selvaġġi u l-annimali kollha, il-bhejjem li jitkaxkru u l-għasafar li jtiru,

¹¹is-slaten tal-art u l-ġnus kollha, il-kbarat u l-imħallfin kollha tal-art,

¹²iż-żgħażagħ u x-xbejbiet ukoll, ix-xjuħ flimkien mat-tfal:

¹³ħa jfaħħru isem il-Mulej, għax ismu waħdu l-għoli, sebħu ’l fuq mill-art u s-sema!

¹⁴Hu għolla l-qawwa tal-poplu tiegħu; dan hu t-tifħir għal ħbiebu kollha, għal ulied Iżrael, il-poplu għażiż tiegħu. Hallelujah!