Read Maltese Bible with DC – IL-BIBBJA IL-KOTBA MQADDSA SALMI 17 Bible Online

SALMI 17 - Maltese Bible with DC – IL-BIBBJA IL-KOTBA MQADDSA bible

SALMI 17

¹Talba. Ta’ David. Isma’, Mulej, il-kawża ġusta tiegħi, ilqa’ l-għajta tiegħi, agħti widen għat-talb tiegħi; bla qerq huma xufftejja.

²Mingħandek toħroġ il-ġustizzja għalija, għajnejk jaraw is-sewwa.

³Jekk qalbi tiflili, jekk billejl iżżurni, jekk inti ġġarrabni, ma ssib ebda qerq fija.

⁴Ma żbaljajtx bi kliemi, kif jagħmlu n-nies; ħarist ruħi bi kliemek minn triqat il-ħżiena.

⁵Il-mixi tiegħi żammejt fi triqatek, qatt ma għotru riġlejja.

⁶Insejjaħlek, għax int tweġibni, o Alla; ressaq widintek lejja, isma’ kliemi.

⁷Uri t-tjieba tiegħek tal-għaġeb; int li teħles mill-għedewwa lil min jittama fil-leminija tiegħek.

⁸Bħal ħabba tal-għajn ħarisni, għad-dell ta’ ġwenħajk kenninni

⁹mill-ħżiena li jagħfsu fuqi, mill-għedewwa qattiela li jdawruni.

¹⁰Għalqu qalbhom għall-ħniena, minn fommhom joħroġ kliem kburi.

¹¹Jiġu għal fuqi, minn kull naħa għalquni, ħarsithom fuqi, biex mal-art jitfgħuni.

¹²Huma bħal iljun imxennaq għall-priża, bħal ferħ ta’ ljun moħbi wara l-mansab.

¹³Qum, Mulej, oħroġ għall-għadu u ġarrfu; eħlisli ħajti minn id il-ħażin.

¹⁴B’sejfek, Mulej, b’idek mill-bnedmin eħlisni, mill-bnedmin li ħajjet din l-art sehemhom. Ħa jimtlew bil-ġid tiegħek, ħa jieklu sax-xaba’ wliedhom, u jibqgħalhom xi jħallu liż-żgħar tagħhom!

¹⁵Imma jien, fil-ħaqq, għad nara ’l wiċċek; meta nqum, nithenna bid-dehra tiegħek[19].