Read Maltese Bible with DC – IL-BIBBJA IL-KOTBA MQADDSA SALMI 18 Bible Online

SALMI 18 - Maltese Bible with DC – IL-BIBBJA IL-KOTBA MQADDSA bible

SALMI 18

¹Għall-mexxej tal-kor. Ta’ David, il-qaddej tal-Mulej, li qal il-kliem ta’ din l-għanja lill-Mulej dakinhar li hu ħelsu minn id l-għedewwa kollha tiegħu u minn Sawl.

²Hu qal: Inħobbok, Mulej, qawwa tiegħi!

³Il-Mulej blata tiegħi, fortizza u ħellies tiegħi, Alla tiegħi, sur tal-kenn tiegħi u tarka tiegħi, qawwa tas-salvazzjoni tiegħi[20] u kenn tiegħi!

⁴Insejjaħ il-Mulej, li hu ta’ min ifaħħru, u nkun meħlus mill-għedewwa tiegħi.

⁵Imwieġ tal-mewt ħakmuni, widien tal-biża’ werwruni,

⁶ħbula tal-imwiet dawruni, xbiek tal-mewt inqaleb fuqi.

⁷Fl-hemm tiegħi lill-Mulej sejjaħt, tlabt l-għajnuna ’l Alla tiegħi; hu sama’ leħni mit-tempju tiegħu[21], f’widnejh waslet l-għajta tiegħi.

⁸Tqanqlet u theżżet l-art[22], triegħdu s-sisien tal-muntanji, u tqanqlu bis-saħna tal-korla tiegħu.

⁹Duħħan ħareġ minn imnifsejh, u nar li jħarbat minn fommu, minnu jarmi ilsna tan-nar.

¹⁰Feraq is-smewwiet u niżel, bi ċpar iswed taħt riġlejh.

¹¹Fuq kerubin rikeb u tar[23], niżel b’ħeffa fuq ġwienaħ ir-riħ.

¹²Bid-dlam insatar bħal b’libsa, sħab iswed u magħqud l-għarix tiegħu.

¹³Mid-dija ta’ quddiemu sħab joħroġ, silġ u ilsna tan-nar.

¹⁴Riegħed il-Mulej mis-smewwiet, l-Għoli semma’ leħnu.

¹⁵Telaq il-vleġeġ tiegħu u xerridhom, għamel il-beraq u ħarrabhom.

¹⁶U dehru qigħan il-baħar, inkixfu s-sisien tal-art, mat-theddida tiegħek, Mulej, man-nefħa ta’ mnifsejk.

¹⁷Mill-għoli medd idu u ħatafni, ħariġni minn baħar ta’ ilma.

¹⁸Mill-għedewwa b’saħħithom ħelisni, mill-għedewwa li jifilħu aktar minni.

¹⁹Ġew fuqi f’siegħa ħażina, iżda l-Mulej waqaf miegħi.

²⁰Ħariġni ’l barra fil-wisa’; ħelisni, għax lili jħobbni.

²¹Ħallasni l-Mulej skont il-ġustizzja tiegħi, raddli skont is-safa ta’ idejja.

²²Għax jien żammejt triqat il-Mulej, ma tbegħidtx bid-dnub minn Alla tiegħi.

²³Quddiemi huma d-digrieti kollha tiegħu; ma warrabtx minni l-preċetti tiegħu.

²⁴Bla tebgħa kont quddiemu, mill-ħtija ħarist lili nnifsi.

²⁵Raddli l-Mulej skont il-ġustizzja tiegħi, skont is-safa ta’ idejja li ra b’għajnejh.

²⁶Ma’ min hu tajjeb inti timxi bit-tajjeb, ma’ min hu bla ħtija inti timxi bla ħtija;

²⁷ma’ min hu safi inti timxi bis-safa, ma’ min jgħawweġ timxi bil-għaqal.

²⁸Għax inti ssalva l-poplu fqajjar, u l-għajnejn kburin tbaxxihom.

²⁹Inti tixgħel, Mulej, il-musbieħ tiegħi; Alla tiegħi jdawwal id-dlam tiegħi.

³⁰Bik jien negħleb il-qtajja’ tal-għedewwa; bl-għajnuna ta’ Alla tiegħi nirbaħ is-swar!

³¹Dritta hi t-triq ta’ Alla; safja hi l-kelma tal-Mulej. Tarka huwa Alla għal kull min jistkenn fih.

³²Għax min hu Alla ħlief Jaħweh? Min hu blata ħlief Alla tagħna?

³³Hu Alla, li ħażżimni bil-qawwa; fetaħli triq dritta quddiemi.

³⁴Bħal taċ-ċriev jagħmilli riġlejja, fuq l-għoljiet fis-sod iqegħedni.

³⁵Idejja jħarriġli għat-taqbida; ark tal-bronż jiġbdu dirgħajja.

³⁶Int tajtni t-tarka tas-salvazzjoni tiegħek, lemintek għenitni, l-għajnuna tiegħek kabbritni.

³⁷Int wessajtli t-triq quddiemi, u ma tfixklux riġlejja.

³⁸Neħodha għal wara l-għedewwa u nilħaqhom, ma nerġax lura qabel neqridhom.

³⁹Nagħtihom daqqa, ma jqumux iżjed minnha; jaqgħu mirbuħa taħt riġlejja.

⁴⁰Int tħażżimni bil-qawwa għat-taqbida, taħti titfa’ ’l dawk li jqumu għalija.

⁴¹Iġġiegħel l-għedewwa jaħarbu quddiemi; jien neqred ’il dawk li jobogħduni.

⁴²Jgħajtu għall-għajnuna, u ħadd ma jgħinhom; lill-Mulej isejħu, u ma jweġibhomx.

⁴³Bħat-trab itir mar-riħ nagħmilhom, bħat-tajn tat-triqat ngħaffeġ fuqhom.

⁴⁴Int teħlisni minn poplu ġellied, fuq il-ġnus inti tqegħedni; u poplu, li ma nafux, jaqdini.

⁴⁵Malli jisimgħu bija, joqogħdu għalija; il-barranin jinxteħtu sal-art quddiemi.

⁴⁶Il-barranin jaqgħu mifnija, joħorġu mwerwra mill-fortizza tagħhom.

⁴⁷Ħaj il-Mulej! Imbierek hu, il-blata tiegħi! Ikun imfaħħar Alla tas-salvazzjoni tiegħi!

⁴⁸Alla, li għenni biex tħallast mill-għedewwa, li qegħedli l-ġnus taħt riġlejja!

⁴⁹Int teħlisni mill-għedewwa tiegħi, tqegħedni fuq min jaħbat għalija, teħlisni min-nies vjolenti.

⁵⁰Għalhekk infaħħrek fost il-ġnus, Mulej, u ngħanni t-tifħir ta’ ismek.

⁵¹Hu jkabbar ir-rebħ lis-sultan tiegħu, juri mħabbtu mal-midluk tiegħu; ma’ David u nislu għal dejjem.