Read Maltese Bible with DC – IL-BIBBJA IL-KOTBA MQADDSA SALMI 19 Bible Online

SALMI 19 - Maltese Bible with DC – IL-BIBBJA IL-KOTBA MQADDSA bible

SALMI 19

¹Għall-mexxej tal-kor. Salm ta’ David.

²Is-smewwiet ixandru l-glorja ta’ Alla, għemil idejh tħabbar il-firxa tas-sema.

³Jum lil ieħor jagħti l-aħbar[24], lejl lil ieħor iwassal it-tagħrif.

⁴Ma hemmx aħbar u anqas kliem, ma hemmx leħen li ma jinstemax.

⁵Mal-art kollha jasal leħenhom, mad-dinja kollha jixtered kliemhom. Lix-xemx għamlilha għarix fihom;

⁶u hi, bħal għarus ħiereġ minn kamartu, ferħana bħal ġgant għall-ġirja tagħha[25],

⁷minn truf is-smewwiet hi toħroġ, sat-truf l-oħra d-dawran tagħha; xejn ma jinħeba mis-sħana tagħha.

⁸Il-liġi tal-Mulej[26] perfetta, u tagħti l-ħajja; ix-xhieda tal-Mulej hi sewwa, u tgħallem lil min ma jafx.

⁹Il-preċetti tal-Mulej dritti, u jferrħu l-qalb; il-kmandament tal-Mulej safi, u jdawwal l-għajnejn.

¹⁰Il-biża’ tal-Mulej sinċier, u jibqa’ għal dejjem; il-ġudizzji tal-Mulej sewwa, u mseddqa għalkollox;

¹¹egħżeż mid-deheb, mid-deheb l-aktar fin, oħla mill-għasel u mill-qtar tax-xehda.

¹²Fehemhom sewwa l-qaddej tiegħek; ħlas tajjeb għandu min iħarishom.

¹³In-nuqqas min jista’ jagħrfu? Minn dak li ma nafx bih saffini.

¹⁴U mill-kburija wkoll ħares il-qaddej tiegħek, tħalliha qatt taħkimni. Imbagħad inkun bla ħtija u ħieles minn dnub kbir.

¹⁵Ħa jkunu milqugħa quddiemek kliem fommi u ħsieb qalbi, Mulej, blata tiegħi u feddej tiegħi.