Read Maltese Bible with DC – IL-BIBBJA IL-KOTBA MQADDSA SALMI 22 Bible Online

SALMI 22 - Maltese Bible with DC – IL-BIBBJA IL-KOTBA MQADDSA bible

SALMI 22

¹Għall-mexxej tal-kor. Fuq l-għanja “Iċ-ċerva tas-sebħ”. Salm ta’ David.

²Alla tiegħi[30], Alla tiegħi, għaliex tlaqtni? Bqajt ’il bogħod u ma salvajtnix, ma tajtx widen għall-għajjat tiegħi!

³Alla tiegħi, ngħajjat binhar u ma tweġibx, ngħajjat billejl u ma nsibx mistrieħ.

⁴Imma int tgħammar fis-santwarju, u lilek ifaħħar Iżrael!

⁵Fik ittamaw missirijietna, fik ittamaw, u inti ħlisthom.

⁶Lejk għajtu, u inti ħlisthom; fik ittamaw u ma tfixklux.

⁷Jien dudu tal-art, u mhux bniedem, żebliħ tan-nies, tkasbir tal-poplu.

⁸Dawk kollha li jarawni jidħku bija, jgħajbuni, iħarrku rashom u jgħidu:

⁹“F’idejn il-Mulej intelaq; ħa jeħilsu hu! Ħa jsalvah hu, la bih jitgħaxxaq!”

¹⁰Imma int minn ġuf ommi lqajtni; fi ħdan ommi fis-sod qegħedtni.

¹¹Fuqek qegħduni sa minn twelidi[31]; int Alla tiegħi sa minn ġuf ommi.

¹²La titbegħidx minni, għax qrib hu t-taħbit, u m’hawn ħadd biex jgħinni.

¹³Qatgħa gniedes daru miegħi; barrin qawwija ta’ Basan[32] għalquni,

¹⁴b’ħalqhom miftuħ għal fuqi, bħal iljun li jaħtaf u jgħajjat.

¹⁵Ninsab bħall-ilma msawwab, għandi għadmi maqlugħ kollu; qalbi hi bħal xemgħa, iddub ġewwa fija.

¹⁶Ħalqi niexef bħal xaqqufa, ilsieni mwaħħal ma’ ħnieki; ninsab mitfugħ fuq trab il-mewt.

¹⁷Qabda klieb daru għalija; ġemgħa nies ħżiena rassewni. Taqqbuli idejja u riġlejja;

¹⁸nista’ ngħodd għadmi kollu. B’għajnejhom fuqi jħarsu lejja.

¹⁹Ħwejġi jaqsmu bejniethom; jaqtgħu x-xorti għal-libsa tiegħi.

²⁰Mulej, la titbegħidx minni; qawwa tiegħi, fittex għinni!

²¹Eħlisli mis-sejf lil ħajti, u mill-klieb lil ħajti l-għażiża.

²²Minn ħalq l-iljun salvani, minn qarn il-gniedes lili msejken.

²³Inxandar ismek lil ħuti; infaħħrek f’nofs il-ġemgħa[33].

²⁴Faħħru l-Mulej, intom li tibżgħu minnu; sebbħuh ilkoll, nisel Ġakobb; ibżgħu minnu lkoll, ulied Iżrael.

²⁵Għax ma warrabx minnu l-imsejken, ma stmellx in-niket tiegħu; anqas wiċċu ma ħeba minnu, imma semgħu meta sejjaħlu.

²⁶Għalhekk nagħtik it-tifħir tiegħi f’ġemgħa kbira; inrodd il-wegħdiet tiegħi quddiem dawk li jibżgħu minnu.

²⁷Jieklu l-fqajrin u jixbgħu; ifaħħru l-Mulej dawk li jfittxuh. Ħa tgħix qalbhom għal dejjem!

²⁸Jiftakru t-truf kollha tal-art, u jerġgħu lura lejn il-Mulej; u quddiemu jinxteħtu r-razez kollha tal-ġnus.

²⁹Għax tal-Mulej hi s-saltna; hu fuq il-ġnus isaltan.

³⁰Lilu jqimu l-bnedmin, li jmutu; quddiemu jmil kull min nieżel ġot-trab. U għalih tgħix ruħi,

³¹lilu jaqdi n-nisel tiegħi.

³²Ixandru ’l Sidi lin-nisel li għad jiġi, ixandru l-ġustizzja tiegħu lill-poplu li għad jitwieled: “Dan għamlu l-Mulej!”