Read Maltese Bible with DC – IL-BIBBJA IL-KOTBA MQADDSA SALMI 25 Bible Online

SALMI 25 - Maltese Bible with DC – IL-BIBBJA IL-KOTBA MQADDSA bible

SALMI 25

¹Ta’ David. Lejk jien nerfa’ ruħi, Mulej, Alla tiegħi.

²Fik jien nittama, ma jkollix għax nitħawwad; ma jifirħux l-għedewwa tiegħi minħabba fija.

³Kull min jittama fik ma jkollux għax jitħawwad; jitħawwad min malajr jonqsok mill-kelma.

⁴Triqatek, Mulej, għarrafni, il-mogħdijiet tiegħek għallimni.

⁵Mexxini fis-sewwa tiegħek u għallimni, għax int Alla tas-salvazzjoni tiegħi. Għalik nixxennaq il-jum kollu.

⁶Ftakar fil-ħniena u t-tjieba tiegħek, għax huma minn dejjem, Mulej.

⁷Tiftakarx fil-ħtijiet u d-dnubiet ta’ żgħożiti: inti tajjeb, Mulej; ftakar fija skont it-tjieba tiegħek.

⁸Tajjeb u sewwa l-Mulej; għalhekk juri triqtu lill-ħatja.

⁹Imexxi l-imsejkna fis-sewwa, jgħallem lill-fqajrin it-triq tiegħu.

¹⁰Il-mogħdijiet tal-Mulej kollhom tjieba u fedeltà għal min iħares il-patt u l-liġijiet tiegħu.

¹¹Minħabba l-isem tiegħek, Mulej, aħfirli ħżuniti, kbira kemm hi kbira.

¹²Min hu dak li għandu l-biża’ tal-Mulej? Lilu hu juri t-triq li għandu jagħżel.

¹³Fil-ġid hu jgħammar, uliedu jiksbu l-art.

¹⁴Midħla l-Mulej ta’ dawk li jibżgħu minnu, lilhom jgħarraf il-patt tiegħu.

¹⁵Għajnejja dejjem fil-Mulej, għax hu mix-xbiek jaqlagħli riġlejja.

¹⁶Dur lejja u kun twajjeb miegħi, għax jiena fqajjar u waħdi.

¹⁷Serraħli qalbi mid-dwejjaq, min-niket tiegħi eħlisni.

¹⁸Ara n-niket u d-diqa tiegħi, u aħfirli ħtijieti kollha.

¹⁹Ara kemm kotru l-għedewwa tiegħi, x’mibegħda qawwija għandhom għalija.

²⁰Ħarisli ħajti u eħlisni; la nistkenn fik, m’għandix għax ninfixel.

²¹Is-sewwa u d-dritt iħarsuni, għax jien fik ittamajt.

²²Eħles, o Alla, lil Iżrael, mid-dwejjaq tiegħu kollha!