Read Maltese Bible with DC – IL-BIBBJA IL-KOTBA MQADDSA SALMI 27 Bible Online

SALMI 27 - Maltese Bible with DC – IL-BIBBJA IL-KOTBA MQADDSA bible

SALMI 27

¹Ta’ David Il-Mulej id-dawl u s-salvazzjoni tiegħi; minn min għandi nibża’? Il-Mulej hu l-kenn tiegħi; quddiem min għandi nitwerwer?

²Meta jqumu għalija l-ħżiena, biex jaħtfuni u jikluni, dawk li għandhom għalija, l-għedewwa tiegħi, huma jitfixklu u jaqgħu.

³Imqar jekk eżerċtu jqum għalija, xejn ma tibża’ qalbi; imqar jekk gwerra tqum kontrija, jiena nibqa’ qalbi qawwija.

⁴Ħaġa waħda tlabt lill-Mulej, ħaġa waħda nfittex: li ngħammar f’dar il-Mulej tul il-jiem kollha ta’ ħajti; biex nitgħaxxaq bil-ħlewwa tal-Mulej jien u nħares lejn it-tempju tiegħu.

⁵Għax hu jaħbini fl-għarix tiegħu meta nsib ruħi fil-għawġ; jistorni fis-satra ta’ daru, fuq blata fl-għoli jqegħedni.

⁶U issa tintrefa’ rasi fuq l-għedewwa ta’ madwari. U jien noffri fit-tempju tiegħu sagrifiċċju b’għajjat ta’ ferħ. Ngħanni u nfaħħar il-Mulej!

⁷Isma’, Mulej, leħen l-għajta tiegħi, ħenn għalija u weġibni.

⁸“Ejja,” għedt f’qalbi, “fittex ’il wiċċu[40]”; jien wiċċek infittex, Mulej.

⁹La taħbix wiċċek minni, la twarrabx bl-herra l-qaddej tiegħek. Inti l-għajnuna tiegħi; tħallinix u titlaqnix, Alla tas-salvazzjoni tiegħi.

¹⁰Għalkemm telquni missieri u ommi, il-Mulej jilqagħni għandu.

¹¹Urini, Mulej, it-triq tiegħek, mexxini minn mogħdija dritta minħabba l-għedewwa tiegħi.

¹²Titlaqnix għax-xewqa tal-għedewwa tiegħi; għaliex xhieda qarrieqa qamu kontrija, li l-qerq jarmu man-nifs tagħhom.

¹³Nemmen li għad nara t-tjieba tal-Mulej f’art il-ħajjin[41].

¹⁴Ittama fil-Mulej, żomm sħiħ u qawwi qalbek; ittama fil-Mulej.