Read Maltese Bible with DC – IL-BIBBJA IL-KOTBA MQADDSA SALMI 28 Bible Online

SALMI 28 - Maltese Bible with DC – IL-BIBBJA IL-KOTBA MQADDSA bible

SALMI 28

¹Ta’ David. Lilek, Mulej, insejjaħ; blata tiegħi, la tittarraxx għalija. Jekk int tibqa’ sieket miegħi, inkun nixbah lil min jinżel fil-ħofra.

²Isma’ leħen it-tnehid tiegħi meta nsejjaħ l-għajnuna tiegħek, kull meta nerfa’ jdejja lejn is-santwarju mqaddes tiegħek.

³Tiġbornix man-nies ħżiena, ma’ dawk li jagħmlu l-ħażen, li kliem ta’ sliem jgħidu lil għajrhom, u qalbhom bil-qerq mimlija.

⁴Ħallashom skont għemilhom, skont l-għemejjel ħżiena tagħhom; skont dak li għamlu jdejhom, roddilhom il-ħlas li ħaqqhom.

⁵Għax ma jaħsbux f’dak li għamel il-Mulej, dak li għamlu jdejh. Hu jeqridhom u ma jqajjimhomx iżjed!

⁶Imbierek il-Mulej, għax sama’ leħen it-tnehid tiegħi.

⁷Il-Mulej hu l-qawwa tiegħi u t-tarka tiegħi, fih ittamat qalbi; ksibt l-għajnuna u ferħet qalbi; irroddlu ħajr bil-għana tiegħi.

⁸Il-Mulej hu s-saħħa tal-poplu tiegħu, kenn tas-salvazzjoni għas-sultan, il-midluk tiegħu.

⁹Salva l-poplu tiegħek, bierek ’il wirtek, kun ir-ragħaj tagħhom, erfagħhom għal dejjem!