Read Maltese Bible with DC – IL-BIBBJA IL-KOTBA MQADDSA SALMI 31 Bible Online

SALMI 31 - Maltese Bible with DC – IL-BIBBJA IL-KOTBA MQADDSA bible

SALMI 31

¹Għal mexxej tal-kor. Salm ta’ David.

²Fik, Mulej, jien nistkenn; ma jkolli qatt għax nirgħex. Fil-ġustizzja tiegħek salvani,

³agħtini widen u fittex eħlisni. Kun blata tal-kenn għalija, fortizza qawwija ta’ salvazzjoni.

⁴Inti l-blata u l-fortizza tiegħi; f’ġieħ ismek mexxini u wassalni.

⁵Oħroġni mix-xibka li ħbew għalija, għax inti l-qawwa tiegħi.

⁶F’idejk jien nerħi ruħi[47]; int teħlisni, Mulej, Alla tas-sewwa.

⁷Int tobgħod ’il min iqim allat fiergħa; imma jien fil-Mulej nittama.

⁸Nifraħ u nithenna għat-tjieba tiegħek, int, li rajt l-hemm tiegħi, li għaraft id-diqa ta’ qalbi.

⁹Ma tlaqtnix f’idejn l-għedewwa, imma qegħedtli fil-wisa’ riġlejja.

¹⁰Ħenn għalija, Mulej, għax ninsab fil-hemm, infnew għajnejja minħabba d-dwejjaq, ruħi wkoll u l-ġewwieni tiegħi.

¹¹Infniet ħajti bl-għali, u bl-ilfiq is-snin ta’ ħajti; minħabba fil-hemm naqsitni saħħti, u tmermer għadmi kollu.

¹²Minħabba l-għedewwa tiegħi kollha, jien sirt ħaġa ta’ min ikasbarha; jitwerwru l-ġirien tiegħi, u min jafni jibża’ minni. Dawk li jarawni barra jaħarbu minni.

¹³Insewni bħal wieħed mejjet, sirt bħal ġarra mkissra.

¹⁴Għax smajt l-għajdut tal-kotra fuqi; biża’ minn kullimkien madwari. Jiftiehmu bejniethom kontrija, jonsbuni biex jeħduli ħajti.

¹⁵Imma jien fik nittama, Mulej; jien ngħidlek: “Alla tiegħi int!”

¹⁶F’idejk hi xortija, eħlisni minn id l-għedewwa, minn id dawk li jeħduha kontrija.

¹⁷Uri d-dawl ta’ wiċċek lill-qaddej tiegħek; fit-tjieba tiegħek eħlisni.

¹⁸Mulej, tħallinix ninfixel, lili li qed insejjaħlek; ħa jinfixlu l-ħżiena, u jinżlu mbikkma f’art l-imwiet!

¹⁹Ħa jisktu x-xufftejn giddieba, li jmaqdru u jkasbru l-ġust bil-kburija!

²⁰Kemm hu kbir il-ġid tiegħek, Mulej, li inti rfajt għal min jibża’ minnek, li int ħejjejt għal min jafda fik, quddiem il-bnedmin kollha!

²¹Bil-ħarsien tiegħek tkenninhom kontra t-tnassis tal-bnedmin; fl-għarix tiegħek taħbihom kontra t-tqassis tal-ilsna.

²²Imbierek il-Mulej li minn belt qawwija għamel miegħi għeġubijiet ta’ tjieba.

²³Jien għedt fil-fixla li kelli: “Ninsab maqtugħ minn taħt għajnejk.” Imma int smajt leħen it-tħannin tiegħi meta sejjaħt l-għajnuna tiegħek.

²⁴Ħobbu l-Mulej, ħbieb tiegħu kollha. Lit-twajbin iħarishom il-Mulej, imma jpattiha sewwa lil min jimxi bil-kburija.

²⁵Issaħħu u qawwu qalbkom, intom ilkoll li tittamaw fil-Mulej.