Read Maltese Bible with DC – IL-BIBBJA IL-KOTBA MQADDSA SALMI 33 Bible Online

SALMI 33 - Maltese Bible with DC – IL-BIBBJA IL-KOTBA MQADDSA bible

SALMI 33

¹Għannu, ġusti, bil-ferħ lill-Mulej; jixirqilhom ifaħħruh in-nies sewwa.

²Faħħru l-Mulej bid-daqq taċ-ċetra; għannulu fuq l-arpa b’għaxar kordi.

³Għannulu għanja ġdida; doqqulu bis-sengħa u b’leħen qawwi.

⁴Għax sewwa hi l-kelma tal-Mulej, kollox bil-fedeltà huwa għamel.

⁵Hu jħobb id-dritt u s-sewwa; bit-tjieba tal-Mulej mimlija l-art.

⁶Bil-kelma tal-Mulej saru s-smewwiet, u b’nifs fommu t-tiżjin kollu tagħhom.

⁷Bħal f’ġarra l-ilmijiet ġabar, u l-ibħra kbar fi mħażen.

⁸Ħa tibża’ mill-Mulej l-art kollha; jitbeżża’ minnu kull min jgħammar fid-dinja.

⁹Għax hu tkellem, u hi saret; hu ordna, u hi twaqqfet.

¹⁰Il-Mulej ixejjen il-fehmiet tal-ġnus, ifixkel il-ħsibijiet tal-popli.

¹¹Imma l-fehma tal-Mulej tibqa’ għal dejjem, minn żmien għal żmien il-ħsibijiet ta’ moħħu.

¹²Hieni l-ġens li l-Mulej hu Alla tiegħu, il-poplu li hu għażel b’wirtu.

¹³Mill-għoli tas-smewwiet iħares il-Mulej, u jara l-bnedmin kollha;

¹⁴mill-post fejn jgħammar jistħarreġ fuq dawk kollha li jgħixu fuq l-art.

¹⁵Hu jsawwar il-qalb ta’ kull wieħed, u jagħraf għemilhom kollu.

¹⁶Ma jagħmel xejn is-sultan bl-eżerċtu tiegħu kollu, anqas ma jeħlisha l-gwerrier bil-ħila kollha tiegħu.

¹⁷Xejn ma jiswa ż-żiemel għar-rebħa, b’saħħtu kollha ’l ħadd ma jeħles.

¹⁸Ara, għajnejn il-Mulej fuq dawk li jibżgħu minnu, fuq dawk li jittamaw fit-tjieba tiegħu,

¹⁹Biex jeħilsilhom mill-mewt ħajjithom, u jaħjihom fi żmien il-ġuħ.

²⁰Ruħna tixxennaq għall-Mulej, hu l-għajnuna u t-tarka tagħna.

²¹Fih jinsab l-hena ta’ qalbna, fl-isem qaddis tiegħu t-tama tagħna.

²²Ħa tkun, Mulej, it-tjieba tiegħek fuqna, kif fik hi t-tama tagħna.