Read Maltese Bible with DC – IL-BIBBJA IL-KOTBA MQADDSA SALMI 34 Bible Online

SALMI 34 - Maltese Bible with DC – IL-BIBBJA IL-KOTBA MQADDSA bible

SALMI 34

¹Ta’ David, meta għamilha ta’ iblah quddiem Abimelek u dan keċċieh, u hu telaq.

²Kull ħin inbierek il-Mulej; tifħiru dejjem fuq fommi.

³Bil-Mulej tiftaħar ruħi; jisimgħu l-fqajrin u jifirħu.

⁴Xandru l-kobor tal-Mulej miegħi; ħa ngħollu ismu flimkien.

⁵Jien fittixt il-Mulej, u weġibni, minn kull biża’ tiegħi ħelisni.

⁶Ħarsu lejh u jiddi bil-ferħ wiċċkom, u ma jkollkomx għax tistħu.

⁷Dan il-fqajjar sejjaħ u l-Mulej semgħu, u mid-dwejjaq tiegħu kollha ħelsu.

⁸L-anġlu tal-Mulej jgħasses madwar dawk li jibżgħu minnu, u jeħlishom.

⁹Ippruvaw u taraw kemm hu tajjeb il-Mulej; hieni l-bniedem li jistkenn fih.

¹⁰Ibżgħu mill-Mulej, qaddisin tiegħu; xejn ma jonqsu min jibża’ minnu.

¹¹Is-setgħana jiftaqru u jbatu l-ġuħ; min ifittex lill-Mulej xejn ma jkun jonqsu.

¹²Ejjew uliedi, isimgħu lili; jiena l-biża’ tal-Mulej ngħallimkom.

¹³Min hu l-bniedem li jħobb il-ħajja, u jixtieq jara għomru kollu riżq?

¹⁴Ħares ilsienek mill-ħażen, u xufftejk minn kliem il-qerq.

¹⁵Tbiegħed mill-ħażen u agħmel it-tajjeb, fittex is-sliem u imxi warajh.

¹⁶Għajnejn il-Mulej lejn il-ġusti, u widnejh miftuħa għall-għajta tagħhom.

¹⁷Il-ħarsa tal-Mulej fuq il-ħżiena, biex jeqred minn fuq l-art tifkirithom.

¹⁸Jgħajtu l-ġusti għall-għajnuna, u l-Mulej jismagħhom; mid-dwejjaq kollha tagħhom jeħlishom.

¹⁹Qrib il-Mulej lejn dawk b’qalbhom maqsuma, jgħin lil dawk b’ruħhom mifnija.

²⁰Kbar huma l-ħsarat tar-raġel sewwa, iżda minnhom kollha jeħilsu l-Mulej.

²¹Iħarislu għadmu kollha, ebda waħda ma titkissirlu.

²²Il-ħażin ħżunitu teqirdu; min jobgħod il-ġust iħallas għall-ħtija.

²³Jifdi l-Mulej il-ħajja tal-qaddejja tiegħu; kull min jistkenn fih ma jkollux xi jpatti.