Read Maltese Bible with DC – IL-BIBBJA IL-KOTBA MQADDSA SALMI 35 Bible Online

SALMI 35 - Maltese Bible with DC – IL-BIBBJA IL-KOTBA MQADDSA bible

SALMI 35

¹Ta’ David. Ħudha, Mulej, ma’ min jeħodha miegħi, tqabad ma’ min jitqabad kontrija.

²Aqbad it-tarka, il-kbira u ż-żgħira, u qum biex tagħtini l-għajnuna.

³Xejjer il-lanza u islet is-sejf għal dawk li jagħmlu għalija. Għidli: “Jiena s-salvazzjoni tiegħek!”

⁴Jitfixklu u jistħu dawk li jfittxu jneħħuli ħajti. Jerġgħu lura mifxula dawk li ħsiebhom kif jagħmluli l-ħsara.

⁵Ħa jkunu bħal karfa mar-riħ, imkeċċija mill-anġlu tal-Mulej.

⁶Tkun triqithom dlam u żliq; u l-anġlu tal-Mulej isuqhom.

⁷Għal xejn b’xejn nasbuli xibka, għal xejn ħaffruli ħofra.

⁸Tiġi fuqhom qerda għal għarrieda, taħkimhom ix-xibka li nasbu, jaqgħu fil-ħofra li ħaffru.

⁹Imma jien fil-Mulej nifraħ, nitgħaxxaq bis-salvazzjoni tiegħu.

¹⁰Saħansitra għadmi kollu jgħid: “Min hu bħalek, Mulej! Int teħles l-imsejken minn min hu aqwa minnu, l-imsejken u l-fqajjar minn dawk li jisirquh.”

¹¹Iqumu xhieda qarrieqa, jistaqsuni dak li ma nafx;

¹²bid-deni għall-ġid iħallsuni; qerduli ruħi.

¹³Iżda meta huma kienu morda, jien kont nilbes l-ixkora[50]; kont ngħakkes bis-sawm lili nnifsi, u nitlob b’rasi mgħaddsa fi ħdani[51].

¹⁴Bħal ħbiebi, bħal ħuti mxejt magħhom; bħal min jagħli għal ommu nxtħett fin-niket.

¹⁵Meta wqajt jien, inġemgħu flimkien jifirħu, ingħaqdu flimkien kontrija. Bla ma naf għaliex jaħbtu għalija, bla heda jtertquni.

¹⁶Mal-ħżiena jkasbruni u jiddieħku bija, jgħażgħżu snienhom kontrija.

¹⁷Int, Mulej Sidi, kemm se ddum tħares? Eħlisni mill-qerda tagħhom, eħlisli mill-iljuni ħajti l-għażiża.

¹⁸Niżżik ħajr qalb ġemgħa kbira, qalb kotra ta’ nies infaħħrek.

¹⁹Tħallix l-għedewwa qarrieqa jithennew minħabba fija; anqas ’il dawk li għal xejn jobogħduni jegħmżu ’l xulxin kontrija.

²⁰Għax huma ma jitkellmux bis-sliem; imqar kontra nies kwieti kliem ta’ qerq jaqilgħu.

²¹Ħalqhom jiftħu beraħ fuqi: “Arah!”, jgħidu ferħana. “Hawn hu taħt għajnejna!”

²²Int rajtu dan, Mulej; la tibqax sieket; Sidi, titbegħidx minni.

²³Stenbaħ u qum biex tagħtini raġun, biex taqbeż għall-kawża tiegħi, Alla tiegħi u Sid tiegħi.

²⁴Skont il-ġustizzja tiegħek agħtini li ħaqqni, Mulej, Alla tiegħi; tħallihomx jifirħu minħabba fija.

²⁵Ħalli ma jgħidux f’qalbhom: “Qtajna xewqitna!” Ħalli ma jgħidux: “Ġibnieh fix-xejn.”

²⁶Ħa jistħu u jinfixlu lkoll flimkien dawk li jifirħu bid-deni tiegħi. Jitgħabbew bl-għajb u bil-mistħija dawk li jitkabbru minħabba fija.

²⁷Jifirħu u jithennew dawk li jgħożżu l-ġustizzja tiegħi; u jgħidu dejjem: ‘Kbir il-Mulej, li jgħożż is-sliem tal-qaddej tiegħu!”

²⁸Imbagħad ixandar ilsieni l-ġustizzja tiegħek, il-jum kollu t-tifħir tiegħek.