Read Maltese Bible with DC – IL-BIBBJA IL-KOTBA MQADDSA SALMI 38 Bible Online

SALMI 38 - Maltese Bible with DC – IL-BIBBJA IL-KOTBA MQADDSA bible

SALMI 38

¹Salm ta’ David. B’tifkira.

²Mulej, la ċċanfarnix fil-korla tiegħek, la twiddibnix fis-saħna tiegħek!

³Għax il-vleġeġ tiegħek daħlu fija, u idek tagħfas fuqi.

⁴Xejn mhu sħiħ f’ġismi minħabba l-għadab tiegħek; m’hemmx saħħa f’għadmi minħabba ħtijieti.

⁵Għax dnubieti telgħu ’l fuq minn rasi, bħal toqol kbir għalija jagħfsu fuqi.

⁶Irejħu u jdennu l-ġrieħi tiegħi, ħtija tal-bluha tiegħi.

⁷Ninsab milwi u mifni għall-aħħar; il-jum kollu ngħaddih fid-dwejjaq.

⁸Għax qabadni ħruq f’ġenbejja, u xejn sħiħ ma għandi f’ġismi.

⁹Mifni nħossni u mfarrak għalkollox; ngħajjat minħabba t-tferfir ta’ qalbi.

¹⁰Sidi, quddiemek hi x-xewqa kollha tiegħi; it-tnehid tiegħi mhux moħbi minnek.

¹¹Qalbi tħabbat, saħħti ħallietni, id-dawl ta’ għajnejja wkoll naqasni.

¹²Ħbiebi u sħabi mill-mard tiegħi jitgerrxu; qrabati jżommu ’l bogħod minni.

¹³Xibka ħejjewli dawk li jonsbuli ħajti, iqassu fuqi dawk li jixtiquli d-deni, il-ħin kollu l-qerq inassu.

¹⁴Imma jien bħal trux li ma jismax; bħal imbikkem li ma jiftaħx ħalqu.

¹⁵Nagħmilha ta’ wieħed li ma jismax, bħal wieħed li xejn ma għandu xi jgħid.

¹⁶Għax fik, Mulej, jien nittama; int li twieġeb, Sid u Alla tiegħi.

¹⁷Jien għedt: “Ma jifirħux minħabba fija, ma jiftaħrux fuqi jekk riġli jogħtor.”

¹⁸Għax jien wasalt biex naqa’, u tbatijieti dejjem quddiem għajnejja.

¹⁹Ħtijieti jien nistqarrhom; nitħasseb fuq id-dnub tiegħi.

²⁰Tqawwew dawk li għal xejn b’xejn huma kontrija; żdiedu dawk li għal xejn jobogħduni;

²¹dawk li jrodduli għall-ġid id-deni; dawk li jiqfuli għax nimxi sewwa.

²²La tħallinix, Mulej; Alla tiegħi, titbegħidx minni.

²³Fittex agħtini l-għajnuna, Sidi, is-salvazzjoni tiegħi.