Read Maltese Bible with DC – IL-BIBBJA IL-KOTBA MQADDSA SALMI 39 Bible Online

SALMI 39 - Maltese Bible with DC – IL-BIBBJA IL-KOTBA MQADDSA bible

SALMI 39

¹Għall-mexxej tal-kor. Għal Ġedutun. Salm ta’ David.

²Jien għedt: “Irrid nara kif nimxi, biex ma nagħmilx dnubiet bi lsieni; inqiegħed fuq fommi sarima, sakemm idum il-ħażen quddiemi.”

³Għalaqt ħalqi u bqajt sieket, żammejt il-kwiet, u xejn ma swieli, l-uġigħ tiegħi aktar ħraxli.

⁴Tħeġġet qalbi ġewwa fija; għall-ħsieb biss, nar tkebbes fija. Inħall imbagħad ilsieni, u jien għedt:

⁵“Għarrafni, Mulej, it-tmiem tiegħi, u kemm hu twil żmien il-jiem tiegħi, ħa nkun naf kemm xejn ma niswa.

⁶Ara, tul xibrejn għamiltli jiemi, żmien ħajti qisu xejn quddiemek. Tassew, daqsxejn ta’ nifs kull bniedem.

⁷Bħal dell jgħaddi l-bniedem, għalxejn joqgħod jitħabat, jaħżen il-ġid bla ma jaf min għad jiġbru.

⁸U issa, Mulej, jien x’nistenna? Fik biss hija t-tama tiegħi.

⁹Eħlisni minn ħtijieti kollha, titlaqnix għaż-żebliħ tal-iblah.

¹⁰Niskot jien, ma niftaħx ħalqi, għax dan hu għemil tiegħek.

¹¹Warrab minni d-daqqiet tiegħek; mifni jien bis-swat ta’ jdejk.

¹²B’kastig tal-ħażen int tgħakkes il-bniedem, bħal kamla tgħarraqlu ġmielu. Tassew, daqsxejn ta’ nifs kull bniedem.

¹³Isma’, Mulej, it-talba tiegħi, agħti widen għall-għajta tiegħi, tibqax trux għad-dmugħ tiegħi. Għax jien mhux ħlief mistieden għandek, barrani, bħal missirijieti kollha.

¹⁴Warrab ħarstek minn fuqi, biex nieħu n-nifs, qabel ma nitlaq u nintemm għalkollox[53].”