Read Maltese Bible with DC – IL-BIBBJA IL-KOTBA MQADDSA SALMI 41 Bible Online

SALMI 41 - Maltese Bible with DC – IL-BIBBJA IL-KOTBA MQADDSA bible

SALMI 41

¹Għall-mexxej tal-Kor. Salm ta’ David

²Hieni min jaħseb fil-fqir u d-dgħajjef; f’jum l-għawġ jeħilsu l-Mulej.

³Il-Mulej iħarsu, jagħtih il-ħajja u jhennih fuq l-art; ma jitilqux għar-rieda tal-għedewwa tiegħu.

⁴Il-Mulej jieqaf miegħu fuq is-sodda tal-mard; ifejqu mill-mard meta jkun mixħut.

⁵Jien għedt: “Ħenn għalija, Mulej; fejjaqni, għax dnibt kontra tiegħek.”

⁶L-għedewwa jixtiquli d-deni u jgħidu: “Meta se jmut u jintemm ismu?”

⁷Min jiġi jżurni jgħid kliem fieragħ; jixtieq isir jaf aħbarijiet ħżiena, biex ixandarhom kif joħroġ barra.

⁸Dawk kollha li jobogħduni jfesfsu bejniethom kontrija; jaħsbu dak li hu ħażin għalija,

⁹“Marda mill-agħar ġiet fuqu; ma jqumx iżjed mnejn hu mixħut!”

¹⁰Imqar ħabibi, li fih kont nafda, li kiel minn ħobżi, intrefa’ kontrija[55].

¹¹Imma int, Mulej, ħenn għalija u qajjimni, u nkun nista’ nagħtihom li ħaqqhom.

¹²Minn dan nagħraf li int kuntent bija, li l-għadu ma jifraħx minħabba fija.

¹³U lili inti żżommni, għax jien bla ħtija, u tqegħedni għal dejjem quddiemek.

¹⁴Imbierek il-Mulej, Alla ta’ Iżrael, minn dejjem għal dejjem. Ammen! Ammen[56]!