Read Maltese Bible with DC – IL-BIBBJA IL-KOTBA MQADDSA SALMI 42 Bible Online

SALMI 42 - Maltese Bible with DC – IL-BIBBJA IL-KOTBA MQADDSA bible

SALMI 42

¹Għall-mexxej tal-kor. Maskil. Ta’ wlied Koraħ.

²Bħalma għażżiela tixxennaq għan-nixxigħat tal-ilma, hekk tixxennaq ruħi għalik, o Alla[57].

³Ruħi għatxana għal Alla, għal Alla l-ħaj; meta niġi u nara wiċċ Alla[58]?

⁴Id-dmugħ lejl u nhar kien l-ikel tiegħi, meta l-jum kollu kienu jgħiduli: “Fejn hu Alla tiegħek?”

⁵Dan niftakar, u nħoss qalbi tinħall ġewwa fija, kif kont nimxi lejn it-tabernaklu tas-sebħ sad-dar ta’ Alla, fost għajjat ta’ ferħ u ta’ radd il-ħajr, qalb folla ferħana.

⁶Għaliex tintelaq, ruħ tiegħi, u titħawwad ġewwa fija? Ittama f’Alla, għax jien nibqa’ nfaħħru;

⁷hu l-għajnuna tiegħi u Alla tiegħi! Tintelaq ruħi ġo fija; għalhekk fik niftakar minn art il-Ġordan[59] u mill-Ħermon u mill-muntanja ta’ Misgħar.

⁸Minn irdum għal irdum jidwu[60] l-ħsejjes qawwija tal-ilmijiet tiegħek; il-ħalel u l-imwieġ kollha tiegħek għaddew minn fuqi.

⁹Lejl u nhar il-Mulej jurini l-ħniena tiegħu; jien ngħanni u nitlob lil Alla l-ħaj[61].

¹⁰Ngħid lil Alla, il-blata tiegħi: “Għaliex tlaqtni? Għax għandi ngħix imdejjaq taħt it-tagħkis tal-għadu?”

¹¹Kull meta jgħajruni l-għedewwa tiegħi, qishom qed ikissruli għadmi; meta jgħiduli l-ħin kollu: “Fejn hu Alla tiegħek?”

¹²Għaliex tintelaq, ruħ tiegħi, u titħawwad ġewwa fija? Ittama f’Alla, għax jien nibqa’ nfaħħru; hu l-għajnuna tiegħi u Alla tiegħi!