Read Maltese Bible with DC – IL-BIBBJA IL-KOTBA MQADDSA SALMI 46 Bible Online

SALMI 46 - Maltese Bible with DC – IL-BIBBJA IL-KOTBA MQADDSA bible

SALMI 46

¹Għall-mexxej tal-kor. Ta’ wlied Koraħ. Fuq “Għalamôt”. Għanja.

²Kenn u qawwa hu Alla għalina, għajnuna kbira sibnieh fid-dwejjaq.

³Għalhekk ma nibżgħux jekk l-art titriegħed[64], jew jiġġarrfu l-muntanji f’nofs ta’ baħar;

⁴anqas jekk jgħajtu u jogħlew ilmijietu, jew jitheżżu l-muntanji bit-tqanqil tiegħu. Il-Mulej tal-eżerċti magħna, fortizza għalina Alla ta’ Ġakobb!

⁵Hemm xmara[65] li s-swieqi tagħha iferrħu l-belt ta’ Alla, l-għamara qaddisa tal-Għoli.

⁶Hemm Alla f’nofsha, ma titħarrikx; jgħinha Alla mat-tbexbix tas-sebħ.

⁷Triegħdu l-ġnus, iġġarrfu s-saltniet, iddewbet l-art, malli samma’ leħnu.

⁸Il-Mulej tal-eżerċti magħna, fortizza għalina Alla ta’ Ġakobb!

⁹Ejjew, araw x’għamel il-Mulej, għemejjel tal-għaġeb fuq l-art.

¹⁰Iwaqqaf il-gwerer sa tarf l-art; l-ark jaqsam u l-lanza jkisser, jaħraq it-tarki bin-nar, u jgħid:

¹¹“Biżżejjed! Kunu afu li jien Alla, għoli fuq il-ġnus, għoli fuq l-art!”

¹²Il-Mulej tal-eżerċti magħna, fortizza għalina Alla ta’ Ġakobb!