Read Maltese Bible with DC – IL-BIBBJA IL-KOTBA MQADDSA SALMI 48 Bible Online

SALMI 48 - Maltese Bible with DC – IL-BIBBJA IL-KOTBA MQADDSA bible

SALMI 48

¹Għanja. Salm ta’ wlied Koraħ.

²Kbir il-Mulej, ta’ min ifaħħru ħafna fil-belt ta’ Alla tagħna. L-għolja qaddisa tiegħu,

³għolja mill-isbaħ, l-għaxqa tal-art kollha. L-għolja ta’ Sijon fil-qalba tat-Tramuntana[66]; hi l-belt tas-sultan il-kbir.

⁴Alla fil-fortizzi tagħha wera ruħu bħal sur qawwi.

⁵Ara, is-slaten ingħaqdu, imxew ilkoll flimkien;

⁶kif rawha, baqgħu mistagħġba, tfixklu u ħarbu.

⁷Hemm qabdithom rogħda kbira, u wġigħ bħal dak tal-ħlas.

⁸Bir-riħ tal-Lvant int tfarrak l-iġfna ta’ Tarsis[67].

⁹Kif smajna, hekk rajna f’belt il-Mulej tal-eżerċti, fil-belt ta’ Alla tagħna. Alla jżommha sħiħa għal dejjem!

¹⁰Naħsbu, o Alla, fuq it-tjieba tiegħek f’nofs it-tempju tiegħek.

¹¹Bħal ismek, o Alla, hekk tifħirek, sa truf l-art jasal. Il-leminija tiegħek bis-sewwa mimlija.

¹²Tithenna l-għolja ta’ Sijon, jifirħu l-bliet ta’ Ġuda, minħabba l-ġudizzji tiegħek.

¹³Duru ma’ Sijon, duru dawra magħha, araw kemm-il torri għandha.

¹⁴Ħarsu sewwa lejn is-swar tagħha, duru bir-reqqa l-fortizzi tagħha, biex ixxandru lin-nisel ta’ wrajkom:

¹⁵Dan hu Alla! Alla tagħna għal dejjem ta’ dejjem. Hu jmexxina għal dejjem!