Read Maltese Bible with DC – IL-BIBBJA IL-KOTBA MQADDSA SALMI 49 Bible Online

SALMI 49 - Maltese Bible with DC – IL-BIBBJA IL-KOTBA MQADDSA bible

SALMI 49

¹Għall-mexxej tal-kor. Ta’ wlied Koraħ. Salm.

²Isimgħu dan, popli kollha; agħtu widen, intom ilkoll li tgħixu fid-dinja;

³kemm iż-żgħar u l-kbar tal-poplu, kemm il-għonja u kemm il-fqar.

⁴Fommi jitkellem l-għerf, u nxandar il-fehmiet ta’ qalbi.

⁵Nagħti widen għal kliem l-għerf; se nfisser fuq iċ-ċetra l-kliem tqil tiegħi[68].

⁶Għax għandi nibża’ mill-jiem ħżiena, meta jdur għalija l-ħażen ta’ dawk li jonsbuni?

⁷F’ġidhom it-tama tagħhom; jiftaħru bil-kotra tal-għana tagħhom.

⁸Ħadd ma jista’ jifdi lilu nnifsu, jew jagħti lil Alla l-prezz tal-fidwa tiegħu[69].

⁹Għoli wisq il-prezz ta’ ħajtu, qatt ma jkun biżżejjed,

¹⁰biex wieħed jgħix għal dejjem u ma jara qatt il-qabar.

¹¹Jara mqar l-għorrief imutu, l-iblah u l-belhieni lkoll jintemmu, u lil ta’ wrajhom iħallu ġidhom.

¹²Qabarhom hu darhom għal dejjem, għamara tagħhom minn nisel għal nisel, għalkemm għamlu isem f’artijiethom.

¹³Imma l-bniedem ma jibqax fil-ġieħ, qisu bħall-bhejjem li jintemmu.

¹⁴Din xortih min jittama fih innifsu; hekk jintemm min jitgħaxxaq bi frugħatu.

¹⁵Bħan-nagħaġ lejn l-imwiet mexjin, il-mewt tkun ir-ragħaj tagħhom; dritt lejn il-qabar jinżlu, jintemmu fl-imwiet bla ġieħ ta’ xejn.

¹⁶Imma lili Alla jifdili ħajti, mis-setgħa tal-imwiet żgur jaħtafni.

¹⁷Tibżax meta xi ħadd jistagħna, meta joktor il-ġieħ ta’ daru.

¹⁸Għax xejn ma jieħu f’mewtu, ġieħu ma jinżilx warajh.

¹⁹Imqar jekk f’ħajtu jħoss ruħu hieni, u jgħid li jfaħħruh għax jgħaddiha tajjeb;

²⁰imur ukoll mal-ġemgħa ta’ missirijietu, li qatt aktar ma jaraw id-dawl.

²¹Imma l-bniedem ma jibqax fil-ġieħ, qisu bħall-bhejjem li jintemmu.