Read Maltese Bible with DC – IL-BIBBJA IL-KOTBA MQADDSA SALMI 50 Bible Online

SALMI 50 - Maltese Bible with DC – IL-BIBBJA IL-KOTBA MQADDSA bible

SALMI 50

¹Salm. Ta’ Asaf, Alla, il-Mulej Alla, tkellem u sejjaħ l-art. Minn fejn titla’ x-xemx sa fejn tinżel,

²minn Sijon, il-ġmiel tagħha, Alla wera d-dija tiegħu.

³Ġej Alla tagħna, ma jibqax sieket; quddiemu nar li jeqred, madwaru tempesta qalila.

⁴Hu jsejjaħ is-smewwiet mill-għoli u l-art, biex jagħmel ħaqq mill-poplu tiegħu:

⁵“Iġimgħu ’l ħbiebi quddiemi, li għamlu patt miegħi bis-sagrifiċċju.”

⁶U jħabbru s-smewwiet il-ġustizzja tiegħu, għaliex Alla nnifsu jagħmel il-ħaqq.

⁷“Isma’, poplu tiegħi, għax se nitkellem, Iżrael, għax se nixhed kontrik. Jiena Alla, Alla tiegħek.

⁸Ma nċanfrekx għas-sagrifiċċji tiegħek; il-vittmi tiegħek maħruqa huma dejjem quddiemi.

⁹Ma neħtieġ ebda għoġol minn tiegħek, jew gidjien mill-imrieħel tiegħek.

¹⁰Għax tiegħi huma l-bhejjem tax-xagħri, eluf huma l-bhejjem fuq l-għoljiet tiegħi.

¹¹Jien nagħraf it-tjur kollha tal-ajru, taħt għajnejja kulma jimxi fir-raba’.

¹²Li kont bil-ġuħ, mhux se ngħid lilek, għax tiegħi l-art u kulma fiha.

¹³Huwa jien se niekol laħam il-gniedes, jew nixrob id-demm tal-gidjien?

¹⁴Agħti ’l Alla sagrifiċċju ta’ radd il-ħajr, u rodd lill-Għoli l-wegħdiet tiegħek.

¹⁵Imbagħad sejjaħli f’jum id-dwejjaq; jien neħilsek, u int tweġġaħni.”

¹⁶Lill-ħażin, imma, Alla jgħidlu: “Kif titkellem fuq il-kmandamenti tiegħi, u żżomm fuq xufftejk il-patt tiegħi,

¹⁷int, li tobgħod it-twiddib, u tixħet kliemi wara dahrek?

¹⁸Jekk tiltaqa’ ma’ ħalliel, tissieħeb miegħu; sehmek taqsam maż-żienja.

¹⁹Fommok ftaħt għall-ħażen, u lsienek il-qerq jinseġ.

²⁰Kontra ħuk toqgħod tpaċpaċ, kontra bin ommok tqassas.

²¹Dan int għamilt, u jien bqajt sieket; forsi ħsibt li jiena bħalek[70]. Issa se nċanfrek, u dan kollu nqiegħed quddiemek.

²²Ifhmuha sewwa, intom li tinsew ’l Alla, li ma naħtafkomx, u ħadd ma jeħliskom.

²³Min iroddli sagrifiċċju ta’ radd il-ħajr, dan isebbaħni; lil min jimxi bis-sewwa nurih is-salvazzjoni ta’ Alla.”