Read Maltese Bible with DC – IL-BIBBJA IL-KOTBA MQADDSA SALMI 54 Bible Online

SALMI 54 - Maltese Bible with DC – IL-BIBBJA IL-KOTBA MQADDSA bible

SALMI 54

¹Għall-mexxej tal-kor. Fuq l-istrumenti tal-korda. Maskil. Ta’ David,

²meta n-nies ta’ Żif ġew jgħidu lil Sawl: “David moħbi fostna.”

³B’ismek[78], o Alla, salvani; agħmilli ħaqq bil-qawwa tiegħek.

⁴Isma’, o Alla, it-talba tiegħi; agħti widen għal kliem fommi.

⁵Għax nies kburin qamu kontrija, nies kefrin jonsbuli ħajti; ma jżommux ’l Alla quddiem għajnejhom.

⁶Ara, Alla l-għajnuna tiegħi; il-Mulej hu dak li jżommni.

⁷Hu jdawwar id-deni għal fuq l-għedewwa tiegħi. Għall-fedeltà tiegħek eqridhom, Mulej!

⁸Minn qalbi noffrilek is-sagrifiċċju; irrodd ħajr lil ismek, għax hu tajjeb.

⁹Għax minn kull hemm ħelisni l-Mulej; jitpaxxew għajnejja bl-għedewwa mirbuħa.