Read Maltese Bible with DC – IL-BIBBJA IL-KOTBA MQADDSA SALMI 55 Bible Online

SALMI 55 - Maltese Bible with DC – IL-BIBBJA IL-KOTBA MQADDSA bible

SALMI 55

¹Għall-mexxej tal-kor. Fuq l-istrumenti tal-korda. Maskil. Ta’ David.

²Agħti widen, o Alla, għat-talba tiegħi, titwarrabx mit-talb umli tiegħi.

³Ismagħni u weġibni, m’għandix mistrieħ fid-dwejjaq tiegħi!

⁴Nirtogħod bil-biża’ għall-ħoss tal-għedewwa, minħabba l-għajjat tal-ħżiena; għax huma jġibu fuqi l-ħsara, fl-għadab tagħhom jeħduha kontrija.

⁵Qalbi tinfena ġewwa fija, biża’ tal-mewt waqa’ fuqi.

⁶Biża’ u tregħid jiġu fuqi, u twerwir jaħkimni.

⁷U ngħid: “Mhux li kelli l-ġwienaħ bħal ħamiema, biex intir u mmur nistrieħ!

⁸Kont ’il bogħod immur niġġerra, u fid-deżert insib fejn noqgħod.

⁹Kont malajr insib fejn nistkenn mir-riħ qawwi u r-riefnu.”

¹⁰Eqridhom, Sidi, ħawdilhom kliemhom[79], għax dnewwa u ġlied fil-belt qiegħed nara.

¹¹Lejl u nhar jiġġerrew fuq il-ħitan tagħha, fiha m’hemmx ħlief ħsara u dwejjaq.

¹²Il-ħerba tinsab ġo nofsha, moħqrija u qerq ma jwarrbux mill-misraħ tagħha.

¹³Mhuwiex xi għadu dak li jċanfarni; li kien hekk, kont nissaporti. Mhux xi wieħed kontrija dak li jkasbarni; li kien hekk, kont ninħeba minnu.

¹⁴Imma int, wieħed bħali, sieħbi u ħabib tal-qalb,

¹⁵li kont nitgħaxxaq nitkellem miegħek, ħaġa waħda konna nkunu fid-dar ta’ Alla.

¹⁶Ħa taqa’ l-mewt fuqhom, ħa jinżlu ħajjin fl-imwiet[80], għax il-ħażen jgħammar fosthom.

¹⁷Imma jien lil Alla nsejjaħ, u l-Mulej isalvani.

¹⁸Filgħaxija, filgħodu u f’nofsinhar[81] nokrob u nitniehed; u hu jisma’ l-leħen tiegħi.

¹⁹Jeħlisli ’l ħajti fis-sliem mill-ġlied li qajmu kontrija, għax ħafna huma li ħabtu għalija.

²⁰Alla jismagħni u jrażżanhom, hu li qiegħed fuq it-tron minn dejjem; għax huma ma jridux jindmu, ma għandhomx il-biża’ ta’ Alla.

²¹Idu rafa’ kontra ħbiebu, kiser il-ftehim tiegħu.

²²Aktar mill-butir hu ħelu fommu, imma qalbu bil-ġlied mimlija. Aktar miż-żejt hu artab kliemu, imma hu bħal sejf mislut.

²³Ħalli xortik f’idejn il-Mulej, u hu jgħinek u jwieżnek; hu qatt ma jħalli l-ġust jitfixkel.

²⁴U int, o Alla, itfagħhom fil-ħofra tat-telfien. Nies tad-demm u tal-qerq, ma jgħixux nofs ħajjithom! Imma jien fik nittama.