Read Maltese Bible with DC – IL-BIBBJA IL-KOTBA MQADDSA SALMI 56 Bible Online

SALMI 56 - Maltese Bible with DC – IL-BIBBJA IL-KOTBA MQADDSA bible

SALMI 56

¹Għall-mexxej tal-kor. Fuq “Il-ħamiema tal-ballut imbiegħed”. Miktam. Ta’ David, meta nqabad mill-Filistin f’Gatt.

²Ħenn għalija, o Alla, għax qegħdin ikasbruni, il-jum kollu jagħmlu għalija u jagħfsu fuqi.

³Il-jum kollu jkasbruni l-għedewwa tiegħi, għax ħafna huma dawk li jeħduha miegħi.

⁴Fik, Alla l-Għoli, jien nittama, meta jkolli għal xiex nibża’.

⁵Bl-għajnuna ta’ Alla nfaħħar kelmtu; f’Alla nafda, m’għandix għax nibża’; x’jista’ jagħmilli l-bniedem?

⁶Il-jum kollu jqassu u jgħidu fuqi, ħsiebhom biss kif jagħmluli l-ħsara.

⁷Jinġemgħu flimkien u jistaħbew, jgħassu l-mixi tiegħi, bit-tama li jneħħuli ħajti.

⁸Għall-ħażen tagħhom ħallashom int, o Alla; bl-għadab tiegħek xejjen il-popli.

⁹Int għaddejt kull ċaqliqa tiegħi; iġma’ fi flixkun id-dmugħ tiegħi[82]. Mhuwiex dan fil-ktieb tiegħek[83]?

¹⁰Imbagħad jerġgħu lura l-għedewwa tiegħi, meta jiena nsejjaħlek. Dan jien naf, li Alla hu miegħi.

¹¹Bl-għajnuna ta’ Alla nfaħħar kelmtu; bl-għajnuna tal-Mulej infaħħar kelmtu.

¹²F’Alla nitma, m’għandix għax nibża’; x’jista’ jagħmilli l-bniedem?

¹³O Alla, jien marbut bil-wegħdiet tiegħek; għalhekk irroddlok sagrifiċċji ta’ tifħir.

¹⁴Għax mill-mewt int ħlistli ’l ħajti u ’l riġli mill-waqgħa, biex nimxi quddiem Alla fid-dawl tal-ħajjin.