Read Maltese Bible with DC – IL-BIBBJA IL-KOTBA MQADDSA SALMI 57 Bible Online

SALMI 57 - Maltese Bible with DC – IL-BIBBJA IL-KOTBA MQADDSA bible

SALMI 57

¹Għall-mexxej tal-kor. Fuq “La teqridx”. Miktam. Ta’ David meta ħarab minn quddiem Sawl u nħeba fl-għar.

²Ħenn għalija, o Alla, ħenn għalija, għax fik jiena nsib il-kenn tiegħi; għad-dell ta’ ġwenħajk nistkenn, sakemm jgħaddi l-hemm minn fuqi.

³Insejjaħ lil Alla l-Għoli, lil Alla, li jieħu ħsiebi.

⁴Jibgħat mis-sema u jsalvani; jitfa’ l-għajb fuq min jgħaffiġni; jibgħat Alla t-tjieba u l-fedeltà tiegħu.

⁵Ninsab mimdud qalb l-iljuni, li jaħtfu lill-bnedmin; snienhom lanez u vleġeġ, u lsienhom sejf misnun.

⁶Ogħla ’l fuq mis-smewwiet, o Alla! Uri l-glorja tiegħek fuq l-art kollha!

⁷Xibka ħejjewli fil-mogħdija; għal ftit ma waqajtx fiha. Ħofra ħaffruli quddiemi, iżda huma waqgħu fiha.

⁸Sħiħa qalbi, o Alla, sħiħa qalbi; ħa ngħanni u ninseġ għanja:

⁹“Qum, ruħ tiegħi, qum, arpa u ċetra! Ħa nqajjem sbieħ il-jum[84]!”

¹⁰Infaħħrek, Sidi, fost il-popli, ngħannilek fost il-ġnus;

¹¹għax m’ogħla s-smewwiet it-tjieba tiegħek, sas-sħab il-fedeltà tiegħek.

¹²Ogħla ’l fuq mis-smewwiet, o Alla! Uri l-glorja tiegħek fuq l-art kollha!