Read Maltese Bible with DC – IL-BIBBJA IL-KOTBA MQADDSA SALMI 59 Bible Online

SALMI 59 - Maltese Bible with DC – IL-BIBBJA IL-KOTBA MQADDSA bible

SALMI 59

¹Għall-mexxej tal-kor. Fuq “La teqridx.” Miktam. Ta’ David, meta Sawl bagħat in-nies jgħassulu f’daru biex joqtlu.

²Eħlisni mill-għedewwa, o Alla tiegħi[88], ħarisni minn dawk li jqumu għalija.

³Eħlisni minn dawk li jagħmlu l-ħażen, salvani min-nies qattiela.

⁴Għax huma jinħbew biex jonsbuli ħajti, nies qalila jinġemgħu kontrija; u dan, Mulej, bla tort u bla ħtija tiegħi.

⁵Għalkemm jien bla ħtija, huma jiġru u jlestu għalija.

⁶Imma int, Mulej tal-eżerċti, Alla ta’ Iżrael, qum, ejja u ara b’għajnejk. Stenbaħ biex tħallas il-ġnus kollha; la tħennx għal min jagħmel il-ħażen bil-qerq.

⁷Jersqu kull filgħaxija, jinbħu bħal klieb, jiġġerrew ’l hawn u ’l hemm mal-belt.

⁸Arahom, kliemhom ibaqbaq fuq fommhom, kliem li jniggeż fuq xufftejhom. “Min se jismagħna?” huma jgħidu.

⁹Imma int, Mulej, tidħak bihom, il-ġnus kollha biċ-ċajt teħodhom.

¹⁰Qawwa tiegħi, jiena lilek nistenna, għax inti, Alla, fortizza tiegħi.

¹¹Alla tiegħi, imħabba tiegħi, jiġi jilqagħni; jurini Alla l-għedewwa tiegħi mirbuħa.

¹²Eqridhom, o Alla, biex ma jinsiekx il-poplu tiegħi, ferrixhom u xejjinhom bil-qawwa tiegħek; int, Sidi, it-tarka tagħna!

¹³Għal dnub fommhom u għal kliem xufftejhom jinqabdu fi kburithom; għall-kliem ta’ saħta u ta’ gideb jinsteħtu.

¹⁴Temmhom b’qilltek, temmhom biex ma jkunux iżjed, biex kulħadd jagħraf li Alla jaħkem fuq Ġakobb sa trufijiet l-art.

¹⁵Jersqu kull filgħaxija, jinbħu bħal klieb, jiġġerrew ’l hawn u ’l hemm mal-belt.

¹⁶Jiġġerrew u jimirħu biex isibu x’jieklu; u jekk ma jixbgħux, tismagħhom jinbħu.

¹⁷Iżda jien ngħanni lill-qawwa tiegħek; ngħanni ferħan filgħodu fit-tjieba tiegħek għax int sirt fortizza għalija, kenn tiegħi f’jum id-dwejjaq.

¹⁸Qawwa tiegħi, lilek ferħan ngħanni; għax inti, Alla, fortizza tiegħi, Alla tiegħi, imħabba tiegħi!