Read Maltese Bible with DC – IL-BIBBJA IL-KOTBA MQADDSA SALMI 60 Bible Online

SALMI 60 - Maltese Bible with DC – IL-BIBBJA IL-KOTBA MQADDSA bible

SALMI 60

¹Għall-mexxej tal-kor. Fuq “Susân Għedût”. Miktam. Ta’ David. Għat-tagħlim.

²Meta David ħadha kontra Aram-Naħarajm u kontra Aram-Soba; u meta Ġowab, hu u ġej lura, qatel tnax-il elf min-nies ta’ Edom f’Wied il-Melħ.

³O Alla, inti warrabtna u kissirtna, għadabt għalina; erġa’ dur lejna!

⁴Int heżżiżt l-art u xaqqaqtha; sewwi l-qsim tagħha, għax saret ħerba.

⁵Urejt l-iebes lill-poplu tiegħek, sqejtna nbid li jsakkar.

⁶Waqqaft stendard għal dawk li jibżgħu minnek, biex lejh jaħarbu u jitbiegħdu mill-ark,

⁷biex ikunu meħlusa l-għeżież tiegħek; għinna bil-leminija tiegħek u weġibni!

⁸Tkellem Alla fis-santwarju tiegħu: “Ferħan nieħu b’sehmi lil Sikem[89], nagħmel oqsma mill-wied ta’ Sukkot.

⁹Tiegħi hu Gilgħad[90], tiegħi Manassi, Efrajm[91] hu l-elmu ta’ rasi, u Ġuda[92] x-xettru tiegħi.

¹⁰Mowab[93] lenbija fejn ninħasel, fuq Edom[94] inqiegħed il-qorq tiegħi, fuq Filistja[95] nifraħ rebbieħ!”

¹¹Min se jwassalni fil-belt bis-swar[96]? Min se jeħodni sa Edom?

¹²Mhux int, o Alla, li warrabtna, u li m’għadekx toħroġ mal-eżerċti tagħna?

¹³Agħtina l-għajnuna kontra l-għadu; għax xejn ma tiswa l-għajnuna tal-bniedem.

¹⁴Bl-għajnuna ta’ Alla nuru ħilitna; hu li jisħaq l-għedewwa tagħna.