Read Maltese Bible with DC – IL-BIBBJA IL-KOTBA MQADDSA SALMI 66 Bible Online

SALMI 66 - Maltese Bible with DC – IL-BIBBJA IL-KOTBA MQADDSA bible

SALMI 66

¹Għall-mexxej tal-kor. Għanja. Salm. Għajtu bil-ferħ lil Alla, bnedmin tad-dinja kollha;

²għannu s-sebħ ta’ ismu, xandru s-sebħ u t-tifħir tiegħu.

³Għidu lil Alla: “Kemm int tal-biża’ f’għemilek! Għall-kobor tal-qawwa tiegħek jitilfu l-ħila quddiemek l-għedewwa tiegħek.

⁴L-art kollha tagħtik qima, tgħannilek u tgħanni lil ismek.”

⁵Ejjew, araw l-għemejjel ta’ Alla; tal-biża’ f’għemilu fost il-bnedmin.

⁶Biddel il-baħar f’art niexfa[102], għaddew bil-mixi minn nofs ix-xmara. Għalhekk, nifirħu bih!

⁷Hu jsaltan bil-kobor tiegħu għal dejjem; b’għajnejh fuq il-ġnus jgħasses; ma jerfgħux rashom in-nies xewwiexa.

⁸Bierku, popli, lil Alla tagħna, semmgħu l-għana tat-tifħir tiegħu.

⁹Hu li jżommna fost il-ħajjin, u ma jħallix riġlejna jogħtru.

¹⁰Għax int, o Alla, ġarrabtna, għaddejtna mill-prova bħall-fidda.

¹¹Ħallejtna naqgħu fix-xibka, issikkajtilna bi ħżiem ġenbejna.

¹²Ħallejt in-nies jirkbu fuq rasna, għaddejtna min-nar u mill-ilma; iżda mbagħad ħriġtna fil-wisa’.

¹³Nidħol f’darek bil-vittmi maħruqa, intemm il-wegħdiet li għamiltlek;

¹⁴il-wegħdiet li tennew xufftejja, u fommi wiegħed fl-hemm tiegħi.

¹⁵Sagrifiċċji ta’ bhejjem imsemmna, duħħan ifuħ ta’ ħrief maħruqa, mogħoż u gniedes inħejjilek.

¹⁶Ejjew, isimgħu, u ngħidilkom, intom ilkoll li tibżgħu minn Alla, ngħidilkom x’għamel miegħi.

¹⁷Lilu sejjaħ fommi, tifħiru kien fuq ilsieni.

¹⁸Kieku żammejt il-ħażen f’qalbi, ma kienx jismagħni Alla Sidi.

¹⁹Iżda Alla tassew semagħni, ta widen għat-talba tiegħi.

²⁰Imbierek Alla, li ma warrabx it-talba tiegħi; ma warrabx minn fuqi t-tjieba tiegħu!