Read Maltese Bible with DC – IL-BIBBJA IL-KOTBA MQADDSA SALMI 67 Bible Online

SALMI 67 - Maltese Bible with DC – IL-BIBBJA IL-KOTBA MQADDSA bible

SALMI 67

¹Għall-mexxej tal-kor. Bl-istrumenti tal-korda. Salm. Għanja.

²Iħenn għalina Alla, u jberikna; idawwar għal fuqna d-dija ta’ wiċċu!

³Biex jingħarfu fuq l-art triqatek, fost il-ġnus kollha s-salvazzjoni tiegħek.

⁴Ifaħħruk il-popli, o Alla, ifaħħruk il-popli kollha.

⁵Jithennew il-ġnus u jgħannu bil-ferħ, għax trieġi l-popli bis-sewwa, u l-ġnus fuq l-art inti tmexxihom.

⁶Ifaħħruk il-popli, o Alla, ifaħħruk il-popli kollha.

⁷L-art tat il-frott tagħha; iberikna Alla, Alla tagħna!

⁸Iberikna Alla, u tibża’ minnu l-art kollha minn tarf għall-ieħor!