Read Maltese Bible with DC – IL-BIBBJA IL-KOTBA MQADDSA SALMI 7 Bible Online

SALMI 7 - Maltese Bible with DC – IL-BIBBJA IL-KOTBA MQADDSA bible

SALMI 7

¹Għanja ta’ David, li għanna lill-Mulej minħabba f’Kus ta’ Benjamin.

²Mulej, Alla tiegħi[8], fik il-kenn tiegħi; salvani minn kull min iħabbatni, u eħlisni,

³li ma jaħtfunix bħal iljun u jqattgħuni, u ma jkunx hemm min jeħlisni.

⁴Mulej, Alla tiegħi, jekk dan jien għamilt[9], jekk ħatja ta’ xi ħażen huma idejja,

⁵jekk b’deni għall-ġid ħallast lil ħabibi[10], jew għal xejn b’xejn ħarbatt l-għadu tiegħi,

⁶ħa jqum l-għadu kontrija u jirbaħni, mal-art taħt riġlejh jitfagħni, u ġieħi fit-trab ikasbarli.

⁷Qum, Mulej, bil-qilla tiegħek, ieqaf kontra s-saħna tal-għedewwa tiegħi; stenbaħ, u agħmilli l-ħaqq li int ordnajt.

⁸Ħa jinġemgħu l-ġnus madwarek; fuqhom int toqgħod fil-għoli.

⁹Mulej, int li tagħmel ħaqq mill-popli, agħmel ħaqq minni, Mulej, skont is-sewwa tiegħi u skont it-tjubija li hemm fija.

¹⁰Ħa jintemm il-ħażen tal-ħżiena, u jitwettaq il-bniedem sewwa. Int li tgħarbel il-moħħ u l-qalb, int Alla ġust.

¹¹It-tarka tiegħi hu Alla, li jsalva ’l min hu qalbu safja.

¹²Alla hu mħallef ġust, Alla li dejjem jitħallas mill-ħażen.

¹³Tassew li l-għadu jiġi u jsinn is-sejf, l-ark jissikka u jimmirah.

¹⁴Diġà ħejja l-armi tal-mewt, il-vleġeġ għamilhom għodda mikwija.

¹⁵Arah, l-għadu jnissel il-ħażen, jitqal bil-qerq u jiled il-gideb.

¹⁶Fetaħ bir u ħaffru sewwa; iżda jaqa’ fil-ħofra li għamel hu.

¹⁷Fuq rasu taqa’ l-ħsara li għamel; fuqu tinżel id-dnewwa tiegħu.

¹⁸Inrodd ħajr lill-Mulej għall-ġustizzja tiegħu; ngħanni isem il-Mulej, isem l-Għoli.