Read Maltese Bible with DC – IL-BIBBJA IL-KOTBA MQADDSA SALMI 71 Bible Online

SALMI 71 - Maltese Bible with DC – IL-BIBBJA IL-KOTBA MQADDSA bible

SALMI 71

¹Fik, Mulej, jien nistkenn; ma jkolli qatt għax ninfixel.

²Għall-ġustizzja tiegħek salvani u ħarisni; agħtini widen u fittex eħlisni.

³Kun sur ta’ kenn għalija; int wegħedt li tiġi dejjem issalvani, għax blata u fortizza int għalija.

⁴Alla tiegħi, ħarisni minn id il-ħażin, minn id il-qarrieq u l-kiefer.

⁵Għax inti, Sidi, it-tama tiegħi; Mulej, inti l-fiduċja tiegħi sa minn żgħożiti.

⁶Fuqek serraħt sa minn twelidi, sa minn ġuf ommi inti ħadtni; inti dejjem it-tifħir tiegħi.

⁷Ħafna huma li stagħġbu bija[117], iżda inti l-kenn qawwi tiegħi.

⁸Mimli fommi b’tifħirek, u b’sebħek il-jum kollu.

⁹Twarrabnix meta nasal għax-xjuħija; titlaqnix meta tħallini saħħti.

¹⁰Għax fuqi jitkellmu l-għedewwa tiegħi; dawk li jonsbuli ħajti flimkien ifesfsu.

¹¹“Alla nsieh!”, huma jgħidu, “Għalih! Aqbduh! Ħadd ma jeħilsu.”

¹²O Alla, toqgħodx ’il bogħod minni; Alla tiegħi, fittex għinni.

¹³Ħa jistħu u jinfnew dawk li jixluni; jimtela biż-żebliħ u l-għajb minn iridli d-deni.

¹⁴Imma jien nibqa’ dejjem nittama, u nkattar tifħirek kollu.

¹⁵Fommi jxandar il-ġustizzja tiegħek, il-jum kollu l-għemejjel tal-għajnuna tiegħek, għalkemm jien stess ma nafx kif ngħoddhom.

¹⁶Nersaq quddiem il-kobor tiegħek, Mulej Sidi, biex il-ġustizzja tiegħek waħdek inxandar.

¹⁷O Alla, sa minn żgħożiti int għallimtni; u jien s’issa għadni nxandar għeġubijietek.

¹⁸Imqar meta nixjieħ u jibjad xagħri, la tinsinix, o Alla; sakemm inxandar għemil idejk lil kull nisel, il-qawwa tiegħek lil kull min għad jiġi.

¹⁹M’ogħla s-smewwiet il-ġustizzja tiegħek o Alla! Ħwejjeġ kbar int għamilt; min hu bħalek o Alla!

²⁰Minn għawġ kbir u qalil int għaddejtni; iżda int terġa’ tagħtini l-ħajja, minn qiegħ l-art terġa’ ttellagħni.

²¹Kattarli l-kobor tiegħi; erġa’ agħtini l-faraġ tiegħek.

²²U jiena nfaħħrek bl-arpa għall-fedeltà tiegħek, Alla tiegħi; ngħannilek biċ-ċetra, Qaddis ta’ Iżrael.

²³Jifirħu xufftejja jien u ngħannilek; tifraħ ruħi, li inti fdejtli.

²⁴U lsieni l-jum kollu jitħaddet fuq il-ġustizzja tiegħek, għax waqa’ fl-għajb u l-mistħija min iridli d-deni.