Read Maltese Bible with DC – IL-BIBBJA IL-KOTBA MQADDSA SALMI 75 Bible Online

SALMI 75 - Maltese Bible with DC – IL-BIBBJA IL-KOTBA MQADDSA bible

SALMI 75

¹Għall-mexxej tal-kor. Fuq “La teqridx”. Salm ta’ Asaf.

²Lilek infaħħru, o Alla, lilek infaħħru; ismek inxandru, għemilek tal-għaġeb inħabbru.

³“Meta jasal il-waqt li jien għażilt, jien nagħmel ħaqq bis-sewwa.

⁴Jekk titriegħed l-art u kulma fiha, jiena nżomm sħaħ il-pilastri tagħha.”

⁵Lill-kburin ngħidilhom: “La titkabbrux,” u lill-ħżiena: “La terfgħux raskom.”

⁶Terfgħux kontra s-sema raskom; titkabbrux ma’ Alla bi kliemkom.

⁷Għax ebda għajnuna ma ssibu, la mil-Lvant, la mill-Punent, la mit-Tramuntana u lanqas minn Nofsinhar;

⁸għax Alla hu l-imħallef: lil wieħed iniżżlu, lil ieħor jgħollih.

⁹Il-Mulej għandu f’idu bieqja[127], bi nbid qawwi, imħawwar tajjeb; minnha jisqihom sal-aħħar qatra: il-ħżiena kollha tal-art jixorbuha.

¹⁰Iżda jien għal dejjem nifraħ; ngħanni lil Alla ta’ Ġakobb.

¹¹L-irjus kollha tal-ħżiena jitkissru; u jintrefgħu l-irjus tal-ġusti.