Read Maltese Bible with DC – IL-BIBBJA IL-KOTBA MQADDSA SALMI 79 Bible Online

SALMI 79 - Maltese Bible with DC – IL-BIBBJA IL-KOTBA MQADDSA bible

SALMI 79

¹Salm ta’ Asaf. O Alla, daħlu l-ġnus f’wirtek, niġġsu t-tempju mqaddes tiegħek, għamlu ’l Ġerusalemm ħerba waħda.

²Taw l-iġsma tal-qaddejja tiegħek b’ikel lit-tjur tal-ajru[134]; taw laħam ħbiebek lill-bhejjem tal-art.

³Xerrdulhom demmhom bħal ilma madwar Ġerusalemm; u ma kienx hemm min jidfinhom.

⁴Waqajna għaċ-ċajt mal-ġirien tagħna, għad-daħk u ż-żebliħ għal ta’ madwarna.

⁵Mulej, għal dejjem se tibqa’ inkurlat magħna? Se tibqa’ mkebbsa bħan-nar il-ħeġġa tiegħek?

⁶Sawwab qilltek fuq il-ġnus li ma jagħrfukx, fuq is-saltniet li ma jsejħux ismek.

⁷Għax huma belgħu l-poplu ta’ Ġakobb, u ħarbtu l-art fejn jgħammar.

⁸Tiftakrilniex il-ħtijiet tal-imgħoddi; fittex ejja u lqagħna bi ħnientek, għax ninsabu mifnija għall-aħħar.

⁹Għinna, o Alla, Salvatur tagħna, f’ġieħ is-sebħ tal-isem tiegħek; eħlisna u aħfrilna dnubietna, minħabba l-isem tiegħek.

¹⁰Għaliex għandhom jgħidu l-ġnus: “Fejn hu Alla tagħhom?” Ħa jkunu jafu l-ġnus quddiem għajnejna li int titħallas tad-demm li xerrdu tal-qaddejja tiegħek.

¹¹Ħa jasal quddiemek ilfiq l-imjassrin; fil-kobor ta’ qawwietek salva ’l dawk li huma għall-mewt.

¹²Dawwar għal seba’ darbiet għal fuq il-ġnus ta’ madwarna it-tkasbir li tefgħu fuqek, Sidna.

¹³U aħna, il-poplu tiegħek u l-merħla tal-mergħa tiegħek, niżżuk ħajr għal dejjem; minn żmien għal żmien inxandru tifħirek.