Read Maltese Bible with DC – IL-BIBBJA IL-KOTBA MQADDSA SALMI 8 Bible Online

SALMI 8 - Maltese Bible with DC – IL-BIBBJA IL-KOTBA MQADDSA bible

SALMI 8

¹Għall-mexxej tal-kor. Fuq “Il-Gittit”. Salm ta’ David.

²Mulej, Sid tagħna, kemm hu kbir ismek fl-art kollha! Int qegħedt is-sebħ tiegħek ’il fuq mis-smewwiet.

³Int, li s-sebħ tiegħek jgħannih fomm it-tfal u t-trabi tal-ħalib; int, li bnejt sur kontra l-għedewwa, biex iġġib fix-xejn l-għadu u ’l min iqum kontrik.

⁴Inħares lejn is-smewwiet, għemil subgħajk, il-qamar u l-kwiekeb li int qegħedt fihom!

⁵X’inhu l-bniedem biex tiftakar fih, bin il-bniedem, biex taħseb fih?

⁶Ftit inqas mill-allat għamiltu[11], bis-sebħ u l-ġmiel żejjintu,

⁷qegħedtu fuq l-għemejjel kollha ta’ idejk! Kollox taħt riġlejh qegħedtlu:

⁸in-nagħaġ u l-baqar kollha, sal-bhejjem tax-xagħri;

⁹l-għasafar tal-ajru u l-ħut tal-baħar, dak kollu li jterraq fil-baħar.

¹⁰Mulej, Sid tagħna, kemm hu kbir ismek fl-art kollha!