Read Maltese Bible with DC – IL-BIBBJA IL-KOTBA MQADDSA SALMI 80 Bible Online

SALMI 80 - Maltese Bible with DC – IL-BIBBJA IL-KOTBA MQADDSA bible

SALMI 80

¹Lill-mexxej tal-kor. Fuq “Il-Ġilji”. Xhieda. Ta’ Asaf. Salm.

²O Ragħaj ta’ Iżrael[135], agħti widen, int li tmexxi bħal merħla ’l Ġużeppi. Int li qiegħed fuq il-kerubini,

³iddi quddiem Efrajm, Benjamin u Manassi. Qajjem il-qawwa tiegħek, u ejja ħa ssalvana.

⁴Reġġagħna għal li konna, Alla tal-eżerċti; itfa’ fuqna d-dija ta’ wiċċek[136], u nkunu salvi.

⁵Mulej, Alla tal-eżerċti, kemm se ddum tinkorla minkejja t-talb tal-poplu tiegħek?

⁶Tmajthom il-ħobż magħġun bid-dmugħ, sqejthom id-dmugħ bix-xaba’.

⁷Għamilt minna t-tilwim tal-ġirien tagħna, l-għedewwa tagħna jiddieħku bina.

⁸Reġġagħna għal li konna, Alla tal-eżerċti; itfa’ fuqna d-dija ta’ wiċċek, u nkunu salvi.

⁹Int qlajt dielja[137] mill-Eġittu, warrabt il-ġnus biex tħawwel lilha.

¹⁰Ħejjejt l-art għaliha; hi xenxlet għeruqha u mliet l-art.

¹¹Tgħattew l-għoljiet bid-dell tagħha, bħaċ-ċedri l-kbar il-friegħi tagħha[138].

¹²Meddet sal-baħar[139] il-friegħi tagħha, sax-Xmara[140] ż-żraġen tagħha.

¹³Għaliex, mela, ġarraft il-ħitan tagħha, u kull min jgħaddi jqaċċat minnha?

¹⁴Iħarbatha l-ħanżir selvaġġ, il-bhejjem tar-raba’ jirgħu fiha.

¹⁵Erġa’ ejja, Alla tal-eżerċti; ħares mis-sema, u ara, u żur ’il din id-dielja.

¹⁶Ħu ħsieb dak li ħawlet lemintek, ir-rimja li int kabbart għalik.

¹⁷Jinqerdu mal-ħarsa qalila ta’ wiċċek dawk li tawha n-nar u qaċċtuha.

¹⁸Ħa tkun idek fuq il-bniedem ta’ lemintek[141], fuq il-bniedem li int saħħaħt għalik.

¹⁹Aħna ma nitbegħdux minnek; roddilna l-ħajja, u aħna nsejħu ismek.

²⁰Reġġagħna għal li konna, Alla tal-eżerċti; itfa’ fuqna d-dija ta’ wiċċek, u nkunu salvi.