Read Maltese Bible with DC – IL-BIBBJA IL-KOTBA MQADDSA SALMI 88 Bible Online

SALMI 88 - Maltese Bible with DC – IL-BIBBJA IL-KOTBA MQADDSA bible

SALMI 88

¹Għanja. Salm ta’ wlied Koraħ. Għall-mexxej tal-kor. Fuq “Fi żmien il-mard”(?). Maskil. Ta’ Ħeman, l-Eżraħi,

²Mulej, Alla tiegħi[160], binhar jien ngħajjat, billejl jien nitniehed quddiemek.

³Ħa tasal it-talba tiegħi għandek, agħti widen għat-talba tiegħi.

⁴Għax ruħi mimlija bil-hemm, lejn il-qabar qed toqrob ħajti.

⁵Jien magħdud ma’ min nieżel fil-ħofra, sirt qisni bniedem bla saħħa.

⁶Fost il-mejtin hu friexi, bħall-maqtulin mimduda fil-qabar, li fihom ma tiftakarx iżjed u mhumiex aktar taħt idejk.

⁷Inti xħettni f’qiegħ il-ħofra, fid-dlamijiet, f’qiegħ l-art.

⁸Fuqi tagħfas il-qilla tiegħek, fuqi tfajt l-imwieġ kollha tiegħek.

⁹Ħadtli ’l ħbiebi ’l bogħod minni, għamiltni ħaġa ta’ għajb għalihom; ninsab magħluq, u ma nistax noħroġ;

¹⁰għajnejja mdallma bil-għali. Lilek, Mulej, kuljum insejjaħ, lejk immidd idejja.

¹¹Tagħmel int għeġubijet mal-mejtin, jew se jqumu l-erwieħ biex ifaħħruk[161]?

¹²Tixxandar fil-qabar it-tjieba tiegħek, jew f’post it-telfien il-fedeltà tiegħek?

¹³Jingħarfu fid-dlam l-għeġubijiet tiegħek, jew f’art il-minsija l-ġustizzja tiegħek?

¹⁴Imma jien, Mulej, lejk ngħajjat, filgħodu għandek tasal it-talba tiegħi.

¹⁵Għaliex, Mulej, twarrabni, u taħbi wiċċek minni?

¹⁶Imsejken jien, u qisni mejjet sa minn żgħożiti, inħossni mifni, imgħobbi bil-biża’ tiegħek.

¹⁷Għaddiet minn fuqi l-qilla tiegħek, fnietni l-imġiba tiegħek tal-biża’.

¹⁸Kuljum bħall-ilma jdawruni, flimkien minn kull naħa jagħlquni.

¹⁹Int bigħedt minni l-ħbieb u l-qraba, sħabi huma d-dlamijiet.